नेपाल वायू सेवाको बिमान अर्घाखाँचीको खिदिममा दुर्घटना भएको आशंका

सन्धिखर्क, अर्घाखाँची, फाल्गुन ४ – नेपाल वायू सेवाको बिमान अर्घाखाँचीको खिदिम-८ स्थित जंगलमा खसेको र दुर्घटनामा चालक दलका तीन सदस्यसहित १८ जनाको मृत्‍यु भएको आशंका गरिएको छ । 

 

 

दुर्घटनास्थल अर्घाखाँची, गुल्मी र पाल्पाको सिमानामा पर्छ । आज पोखराबाट जुम्लाका लागि उडेको ट्वीनअटर बिमान १ बजेर १३ मिनेटमा सहयोगका लागि भैरहवा बिमानस्थलको सम्पर्कमा आएपछि सम्पर्कबिहीन भएको थियो । दुर्घटनास्थल भनिएको अर्घाखाँचीको खिदिमस्थित जंगल पुगेका प्रहरी, स्थानीय र सञ्चारकर्मीको टोलीले दुर्घटनाग्रस्त जहाज नभेटिएको जनाएको छ । उद्दार कार्यका हेलिकप्टरमा खटिएको नेपाली सेनाको टोलीले पनि दुर्घटनास्थल पत्ता लागिनसेको जनाएको छ ।

१२ बजेर ४० मिनेटरमा पोखराबाट उडेको ९ एन एबीबी कल साईन भएको जहाज साढे एक बजेसम्म जुम्ला पुगिसक्नुपर्ने थियो । जहाजका पाइलट शंकर श्रेष्ठ थिए । सहायक पाइलट रविन्द्र बञ्जारा र परिचारिका मुना महर्जन थिए ।   

बिमान खसेको आशंका गरिएको जंगलबाट धुँवाको मुस्लो आएपनि घटनाको पुष्टी भइसकेको छैन् । घटनास्थल र वरपरका जिल्लामा असिना पानीसँगै कुहिरो लागेको छ ।

स्थानीयबासीको अनुसार घटनास्थलमा हेलिकप्टर आएर अवतरण गर्न खोजेपनि खराब मौसमका कारण फर्किएको छ । घटनास्थलतर्फ पाल्पाको तानसेनबाट नेपाली सेनाको टोली र मुझुम प्रहरी चौकीबाट प्रहरी गइरहेको छ । पाल्पाको तानसेनबाट घटनास्थल पुग्न दुई घण्टा लाग्छ । खोजीका लागि नेपाली सेनाको हेलिकप्टर परिचालित छ ।

 

केही समाचार RSS, NAGARIKNEWS, EKANTIPUR बाट