तम्घास, गुल्मी (२०७१ वैशाख ७, आइतवार) । गुल्मी जिल्लाको दरबार देविस्थानबाट सदरमुकाम तम्घासतर्फ आउंदै गरेको जीप बिहान दरबार देविस्थान ८ तेलपोखरामा दुर्घटना हुँदा अर्घाखाँची बल्कोट ८ का सानु मिया सहित चार यात्रुको मृत्यु भएको छ । दुर्घटनामा १७ घाइते छन् ।
बल्कोटका ५० वर्षीय सानु मिया गुल्मीको दरबार देविस्थानबाट तम्घासतर्फ आउंदै गर्दा घटनास्थलमा नै मृत्यु भएको हो ।
साथै घाइतेमध्ये ७ को जिल्ला अस्पताल तम्घासमा उपचार भइरहेको छ । अन्य १० जनालाई उपचारका लागि लुम्बिनी मेडिकल तथा शिक्षण अस्पताल पाल्पा लगिएको छ । पाल्पा लगिएको मध्ये ४ को अवस्था गम्भीर रहेको अस्पतालले जनाएको छ ।
प्रहरी नायव उपरीक्षक राजकुमार लम्सालका अनुसार लु१ज २५२९ नम्बरको जीप दुर्घटना भएको हो । दुर्घटनामा सानु मिया सहित देविस्थान ८ का ८ वर्षीय बालक विवश सारु, सोही स्थानका २४ वर्षीय महेन्द्र कुँवर, ५० बर्षीया जमुना खत्रीको मृत्यु भएको हो ।
जिपमा २२ जना सवार रहेका थिए । यात्रुहरुको चाप थेग्न नसक्दा जीप सडकबाट झण्डै ५० मिटर तल खसेको छ ।
बैशाख ७ गते, २०७१ मा प्रकाशित
