काठमाडौ, वैशाख १३ – एसएलसीको उत्तरपुस्तिका परीक्षण संलग्न शिक्षकले पारिश्रमिक बढाउन माग गरेका छन् । पाँच दिनअघि ध्यानाकर्षण गराएका शिक्षकले माग सुनुवाइ नभएको भन्दै शनिबारदेखि कालोपट्टी बाँधेर काम थालेका छन् ।
उत्तरपुस्तिका परीक्षण संघर्ष समितिका संयोजक झम्कप्रसाद चौलागाईंले दुई दिनभित्र सम्बोधन नभए कपी परीक्षण बहिष्कार गर्ने बताए । शिक्षकले एसएलसीको एउटा उत्तरपुस्तिका जाँचेको १५ रुपैयाँ पाउँछन् । कक्षा ११ र १२ को उत्तरपुस्तिका परीक्षण गर्नेलाई एकप्रतिको २५ रुपैयाँ दिइन्छ ।
परीक्षा नियन्त्रक विष्णुबहादुर द्वारेले शिक्षकको माग जायज भए पनि पारिश्रमिक बढाउन नियन्त्रण कार्यालयको निर्णय मात्रले नहुने बताए । ‘उहाँहरूको मागलाई तत्काल बोर्ड बैठकमा राखेर र शिक्षा मन्त्रालयमा पेस गर्नेछौं,’ उनले भने । पारिश्रमिक बढाउन शिक्षाले अर्थ मन्त्रालयबाट स्वीकृति लिनुपर्ने प्रावधान छ । यो वर्ष करिब छ लाखले एसएलसी दिएका छन् ।
EKANTIPUR
प्रकाशित मिति: २०७१ वैशाख १३
बैशाख १३ गते, २०७१ मा प्रकाशित
