काठमाडौ – शनिवारको महाभूकम्पपछि काठमाडौं उपत्यकाका आम सर्वसाधारण घरबाहिर खुल्ला स्थानतर्फ एकत्रित भएका छन् ।
पटक-पटक भूकम्पको धक्का आउने क्रम जारीरहेकाले मानिसहरूमा त्रासका कारण घर बाहिर बसेका हुन् ।
काठमाडौँको खुलामञ्च (टुँडिखेल)मा पाल नै राखेर बस्ने क्रम देखिएको छ भने सानो गौचरण, नयाँ बानेश्वरको संविधानसभा भवनस्थल, रत्नपार्क, सिंहदरबारभित्रजस्ता खुल्लास्थलमा मानिसहरू भेला भएका छन् । बालबालिका, बूढाबूढी, महिला र अन्य सर्वसाधारण कतिबेला पुनः भूकम्प जाने हो भन्ने यकिन नभएकाले घरभित्र बस्न सक्ने स्थितिमा छैनन् ।
उदयपुर घर भई काठमाडौँको क्षेत्रपाटीमा बस्दै आएका किशोर राईले भूकम्प फेरि आउने डरले खुलामञ्चमा आएर बसेको बताए ।
बर्दिया घर भई काठमाडौँको भोटेबहालमा बस्दै आएका गणेश रसाइलीले पसल बन्द गरेर दिउँसो १ बजेदेखि खुलामञ्च आएर बसेको बताए ।
‘फेरि भूकम्प आउने डरले दिउँसोदेखि बेलुकाको खानेकुरा र ओड्ने ओछ््याउने सामग्री लिएर खुलामञ्चमा आएर बसेका हौँ,’ उनले भने ।
दुवै खुट्टा भाँचिएर ह्विलचियरको सहारामा हिँडेका सिन्धुपाल्चोकका रेशम बुढाथोकीले आफ्नो बसाइँ पुरानो बसपार्क भए पनि खुलामञ्चमा आएर बसेको जानकारी दिए ।
प्रमुख सार्वजनिक स्थलमा पर्खाल र सहरका साना तथा पुराना घर र भौतिक संरचना भत्किएकाले उद्धार कार्यलाई एकीकृत गराउन कठिनाइ देखिएको छ । ती स्थानका वरिपरिका कतिपय सडक पनि चर्किएका छन् ।
यसरी खुला ठाउँमा भेला हुनेले भूकम्पसम्बन्धी समाचारका ताजा विवरण लिने काम गरिहेका छन् भने मानिसहरूले स्वयम्सेवी रुपमा सहयोग आदानप्रदान गरिरहेका छन् । रासस
बैशाख १२ गते, २०७२ मा प्रकाशित
