खन खलकटेराकी कमला बिक बेपत्ता भएको ११ वर्षपछि घर फर्किन्

खन, अर्घाखाँची (अर्घाखाँची डट्कम) ।  अर्घाखाँची जिल्लाको खन-५, सिलिमडाँडा, खल कटेराकी कमला बिक बेपत्ता भएको ११ वर्ष पछि घर फर्केकी छन् । उनी र उनको घरमा यतिबेला खुशी फर्केको छ । 

कमला भारतको उत्तराखन्ड राज्यको देरादुनमा फेला परेको समाचार अर्घाखाँची डट्कममा प्रकासित भएकोले यो सम्भव भएको हो । सामाजिक कल्याण मन्त्रालय, उत्तराखन्ड सरकारका मनोज चन्द्रान भन्ने एक कर्मचारीले जानकारी गराए अनुसार करिव ७ वर्ष ( सन् २००९, अप्रिल)  तिर हरिद्दारमा फेला परेकी  कमला देरादुनको  नारी निकेतन भन्ने एक आश्रय घरमा बस्दै आएकी थिईन । उनी ११ वर्ष देखि बेपत्ता भएकी थिईन, त्यो बिचको ३ वर्ष कहाँ बसिन् उनले अझै बताएकी छैनन । उनलाई कसले जिल्लाबाट देरादुन पुर्याएको हो भन्ने पनि थाहा हुन सकेको छैन । 

डट्कममा समाचार प्रकासित भएको  २४ घण्टामा नै उनका आफन्तहरुको पहिचान भएको थियो । सोही अनुसार डट्कमका दिल्ली प्रमुख बाबु रोका मगरको सहजिकरणले उनलाई लिनको लागि अर्घाखाँचीको खनबाट उनका दाई जनक विक र गाउँले ईन्द्र मणी रिजाल देरादुन पुगेका थिए । त्यहाँ शुरुमा आफ्नो दाईलाई ११ वर्ष पछि भेट्दा कमलाको खुशीको सिमा थिएन, दाई-बहिनी हर्षका आशु झारेका थिए । उनिहरु गत आईतावार देरादुनको नारी निकेतनबाट नेपाल फर्केका थिए ।

  

यस्तो उपकारको काम गर्ने मौका पाएकोमा आफुहरु असाध्यै खुशी भएको बताएका मनोज चन्द्रानका अनुसार  वर्षौ सम्म कमलालाई देरादुनको उक्त आश्रय घरमा सबै हेरचाह, औषधी उपचार नियमित राम्रो भएको थियो । उनको हल्का मानसिक अवस्था ठीक नहुँदा त्यहाँका  कर्मचारीले घर, परिवारको पहिचान गर्न सकेका थिएनन् । उनी प्राय एकहोरो टोलाएर बस्ने गर्थिन् । अहिले भने सम्पूर्ण स्वास्थ्य अवस्था सामान्य छ ।  

डिभर्ना -१ ( अहिलेको सन्धिखर्क नगरपालिका – १४ ) का भेष बहादुरसँग बिहे गरेकी कमला ३ वर्ष घरजम गरेको थिईन्, त्यसपछि श्रीमानसँग दिल्ली गएर बसेकी थिईन र केही समयको बसाईपछि उनको हल्का मानसिक अवस्था ठीक नहुँदा भेष बहादुरले घरमा लगेर राखेका थिए तर सोही समयमा नै श्रीमानले अर्की श्रीमती भित्राएका थिए । त्यसको केही समय पछि माईत गएर बसेकी कमला, दिदीको घर जान्छु भनेर हिंडेकी थिईन् । तर नत दिदीको घरमा गईन् नत माईती घर फर्किन् । उनको खोजी गर्दा गाउँमा सबैले आशा मरेर बसेका थिए । गरिवीताको कारणले उनका बुवा टिका बहादुर विश्वकर्मा कोही गएर खोज्न, प्रहरीलाई जानकारी गराउन जान समेत सकेनन् ।  

उता आमा कौसल्या विश्वकर्मा लामो समय सम्म छोरी नभेटिदा ठुलो चिन्तामा थिईन्, उनको ४ वर्ष अघि मृत्‍यु भईसकेको छ । तर कमलाले आमा खै भनेर बारम्बार सोध्ने गरेता पनि घुम्न गएको छ भनेर बताउदै आएका छौ, दाई जनकले भने; घरमा अहिले एक बाबु मात्र छन् । दाई-भाई छुट्टीएर बसेका छन् । उनिहरुको आर्थिक अवस्था सार्है कमजोर छ । देरादुनको  नारी निकेतनले दिएको औषधी अहिले सम्म खुवाएका छौ, अब लेखिदिएको दवाई किन्न पैसा नभएको पनि जनकले बताए । 

अहिले कमला घरमा आफ्ना बुवासँग खुशीसाथ बसेकी छिन्, बुवा- गाउँले छरछिमिकीसँग पुराना कुरा शेयर गर्छिन् । छोरीको आशा मारेर बसेका थियौ, तर एक्कासी भारतमा छे रे भन्दा धेरै धेरै खुशी भयौ, जीवनको खुशी यही नै हो, बुवा टिका बहादुरले भने । छोरीलाई यतिका वर्ष सम्म हेरचाह गर्ने र घर फर्काउन सहयोग गर्नेलाई धन्यवाद, भगवानले राम्रो गरुन, उनले भने ।