अब हंसपुर – गोखुंगा हुँदै प्यूठानसम्म जोडियो सडक ! अर्घाखाँची – प्यूठानलाई मितेरी सम्बन्धको रुपमा विकास गर्न जोड

सन्धिखर्क, अर्घाखाँची । अर्घाखाँची जिल्लाको हंसपुर ३ कमेरेपानी बाघखोरदेखि लुंगचुंग, कालुकादीप, बिड्डाँडा हुँदै बिड्डाँडा फेदी र  गोखुंगा हुँदै प्यूठानको बांगेमरोठ सौतामारे-विड्डाँडा जोड्ने साढे आठ किलोमिटर सडक निर्माण कार्य पुरा भएको छ । सडक निर्माणको काम पुरा भएपछि विहिवार औपचारिक कार्यक्रम गरी उद्घाटन गरिएको छ ।

नेकपा एमालेका केन्द्रिय सदस्य एवं पर्यटन प्रवद्र्धन विभाग प्रमुख सूर्य थापा र प्यूठान क्षेत्र नम्वर २ का सांसद् हिरा बहादुर के.सी.ले संयूक्त रुपमा उद्घाटन गरेका हुन् । दुवै जिल्लाको संगमस्थल अर्घाखाँची गोखुंगाको कालुकादिपमा आयोजित उद्घाटन कार्यक्रममा प्रमुख अतिथी थापाले बाटोको थप स्तरोन्नतीका लागि आफूले सक्दो पहल गर्ने बताए ।

दुवै जिल्ला जोड्ने सडकलाई मितेरी सम्बन्धको रुपमा विकास गर्नुपर्छ,उनले भने, सडक पुगेर मात्र गाउँको विकास हुँदैन । गाउँमा स्थानीय बस्तुहरुको उत्पादन गरि निकासी गर्नतर्फ समेत जोड गर्नुस् । विकासको मुुद्दामा सवै राजनीतिक दलले साझा धारणा बनाएर अघि बढ्नुपर्नेमा समेत उनले जोड दिए ।

ऋणमै भएपनि दुवै जिल्लाका उपभोक्ताहरुले यसवर्ष सडक निर्माणको काम पुरा गरेको उपभोक्ता समितिका अध्यक्ष इमानसिंह के.सी.ले बताए । आर्थिक वर्ष २०६८-०६९ देखि सडक निर्माणको काम थालिएको बताउँदै उनले ऋण तिर्नका लागि सम्वन्धित निकायबाट सहयोग हुनुपर्नेमा आग्रह गरे ।

वर्षौदेखिको गाउँमा गाडी गुडाउने सपना पुरा भएको छ,उनले भने, ऋणै ऋणमा भएपनि बाटो पुरा गरेका छौँ । सडक निर्माणको काम थाल्दादेखि हालसम्म ३२ लाख १२ हजार ६ सय ५० रुपैयाँ खर्च भएको उनले जानकारी गराए । ६ लाख ७२ हजार ५ सय रुपैयाँ ऋण रहेको उनले बताए । सडक निर्माणका लागि गाउँलेले ६ लाख १९ हजार ५ सय ३० रुपैयाँ बरावरको जनश्रमदान गरेका छन् ।

गाविस, जिविस, प्यूठान क्षेत्र नम्वर २ का सांसद् हिरा वहादुर के.सी.र सांसद् दुर्गा पौडेलको सांसद् विकास कोष मार्फत सडक निर्माणमा सहयोग भएको उपभोक्ता समितिका सचिव श्रवण के.सी.ले बताए । सौतामारे फेदी-रागामारे हुँदै अर्घाखाँचीको गोखुंगा पुग्नका लागि २५ किलोमिटरको घुमाउरो सडक साढे ८ किलोमिटरमै सिमित भएको उनको भनाई छ ।

यस्तै, अर्घाखाँची जिविस, हंसपुर र गोखुंगा गाविसको गरी १३ लाख २२ हजार २ सय ४२ रुपैयाँ लगानी भएको उपभोक्ता समितिका अध्यक्ष दिनामणी पन्थीले जानकारी गराए । २ लाख ६२ हजार २ सय ४२ रुपैयाँ ऋण रहेको उनले बताए ।

सडक निर्माण गर्दा लागेको ऋण पुरा गर्न आफूले सक्दो प्रयास गर्ने कार्यक्रमका विशेष अतिथी एवं प्यूठान क्षेत्र नं २ का सांसद् हिरा बहादुर के.सी.ले प्रतिवद्धता व्यक्त गरेका छन् । आगामी आर्थिक वर्षमा पनि यस सडकलाई उच्च प्राथमिकता दिएर बजेट विनियोजन गर्ने समेत उनले जानकारी गराए ।