इराकमा ५० भन्दा धेरै सामूहिक चिहान फेला परेको संयुक्त राष्ट्रसंघका अधिकारीले बताएका छन् । पहिले बिद्रोही संगठन इस्लामिक स्टेट आइएसको नियन्त्रणमा रहेको क्षेत्रमा ५० भन्दा धेरै सामूहिक चिहान फेला परेको संयुक्त राष्ट्रसंघका दूत ज्यान कुबिसले बताउनुभयो । उहाँले राष्ट्रसंघको सुरक्षा परिषदमा यो आइएसले गरेको जघन्य अपराधको प्रमाण रहेको बताउनुभयो ।
आइएसको नियन्त्रणमा रहेका क्षेत्रमा सरकारी सेनाले फेरि आफ्नो नियन्त्रण कायम गरेपछि पछिल्लो केही महिनामा यस्ता चिहान फेला पारिएको राष्ट्रसंघका दूत कुबिसले बताउनुभयो । पछिल्लो पटकमात्रै अप्रिलमा रमादी शहरमा ४० जनाको सामूहिक चिहान फेला परेको थियो । राष्ट्रसंघका दूत कुबिसले यस विषयमा अन्तर्राष्ट्रिय समुदायले प्रभावकारी कदम चाल्नु पर्नेमा जोड दिनुभएको छ । कुबिस इराकमा सहयोग मिसनका लागि संयुक्त राष्ट्रसंघका विशेष प्रतिनिधि हुनुहुन्छ । आइएसका लडाकुको पारदर्शिता र उनीहरुले गरेका अपराधका बारेमा चनाखो हुनुपर्ने उहाँको भनाई छ ।
इराकी सेनाले गएको वर्षको डिसेम्बरमा रमादीबाट आइएसका लडाकुलाई लखेटेको थियो । आइएसका लडाकुले गएको वर्षको मेदेखि रमादीमा कब्जा जमाएका थिए ।
अहिले इराकमा सुधार हुँदै गएपनि मानवीय अवस्था अझै पनि खतरापूर्ण रहेको भन्दै मानवीय सहायताका लागि अन्तर्राष्ट्रिय समुदाय एकजुट हुनुपर्ने उहाँले बताउनुभयो । इराकमा मानवीय सहायताका लागि आवश्यक मध्ये एक चौथाइमात्रै उपलब्ध भएको उहाँको भनाई छ ।
बैशाख २५ गते, २०७३ मा प्रकाशित
