सन्धिखर्क- चुत्राबेशीको जनज्योति उमावीका विद्यार्थीले ‘भारतले जे भनेनी स्विकार गरि मान’ भन्दै गीत गाए, व्यापक आलोचना ( भिडियो – फोटो सहित )
आषाढ़ १२ गते, २०७३ मा प्रकाशित
सन्धिखर्क, अर्घाखाँची ( अर्घाखाँचीडट्कम ) । उपप्रधान तथा उर्जा मन्त्री टोपबहादुुर रायमाझी प्रमुख अतिथी बनेर पुगेको कार्यक्रममा आयोजकले ‘भारतले जे भने पनि नेपालले मान्नुपर्ने’ भन्दै स्वागत गीत गाएपछि व्यापक आपत्ती – आलोचना भएको छ । देशको स्वाभिमानमा आँच आएको भन्दै यसको फेसबूक लगायत सामाजिक सन्जालमा चर्को आलोचना भएको छ ।
अर्घाखाँचीको सन्धिखर्क- २ स्थित जनज्योति उमावीका विद्यार्थीले ‘भारतले जे भनेनी स्विकार गरि मान’ भन्दै स्वागत गीत गाएका हुन् । भारतीय राजदूतावासको १ करोड ५१ लाख रुपैयाँ अनुदान पछि बनेको विद्यालय भवनको आईतबार भएको उद्घाटन समारोहमा उपप्रधान तथा उर्जामन्त्री टोपबहादुर रायमाझी, भारतीय राजदूत रणजीत राय पुगेका थिए ।
उद्घाटन समारोहमा रायमाझी प्रमुख अतिथि थिए भने, राय विशिष्ट अतिथि बनेर विद्यालय भवन उद्घाटन गर्न पुगेका थिए । विद्यार्थीहरुले स्वागत गीत गाउँदा ‘भारतले जे भनेपनि नेपाल’ले मान्नु पर्ने सुनाएपछि अविभावक लगायत सम्पूर्ण अचम्ममा परेका थिए ।
कार्यक्रममा प्रमुख अतिथी बनेर गएका उपप्रधान तथा उर्जामन्त्री टोप बहादुर रायमाझीले पनि यसै विद्यालयमा अध्ययन गरेका थिए । ‘मैले ४१ वर्ष अघि यही विद्यालयमा पढेको थिएँ,’ कार्यक्रममा उनले भने, ‘विद्यालयको उन्नतिको लागि सवस्टेशनहरु बनाउने कार्य गर्दैछु ।’
कार्यक्रममा विशिष्ट अतिथी बनेका भारतीय राजदूत रणजीत रायले पनि बोलेका थिए । विहान ७ बजेदेखि चलेको उक्त कार्यक्रम १० बजे नै सकिएको थियो ।
आषाढ़ १२ गते, २०७३ मा प्रकाशित
