सिरियामा जारी द्वन्द्व समाधानका लागि एकीकृत प्रयास गर्न अमेरिका र रुस सहमत भएका छन् ।
आगामी सोमबार साँझदेखि सिरियामा विद्रोहीविरुद्ध एकीकृत कारबाही अभियान चलाउन दुई देश शुक्रबार सहमत भएका छन् ।
योसँगै दुई देशबीच उत्पन्न भएको शत्रुता अन्त्य गर्नसमेत दुई देश सहमत भएका हुन् ।
सिरियामा विद्रोहीविरुद्ध एकीकृत कारबाही अभियानपूर्व सिरिया सरकारलाई विपक्षीको नियन्त्रणमा रहेको क्षेत्रमा सैन्य कारबाही रोक्न आग्रह गरिने भएको छ ।
त्यसका लागि अमेरिकाले संयुक्त केन्द्र स्थापना गर्ने र त्यही केन्द्रमार्फत् इस्लामिक स्टेट (आइएस) तथा अल-नुस्राविरुद्ध संयुक्त कारबाही अभियान चलाइने अमेरिकी विदेशमन्त्री जोन केरीले बताएका छन् ।
जेनेभामा अमेरिकी विदेशमन्त्री जोन केरी र रुसी विदेशमन्त्री सर्गेइ लाभरोभबीच भएको छलफलपछि दुई देशले सिरिया मुद्दामा एक भएर लाग्ने घोषणा गरेका हुन् ।
तर, यसका लागि सिरिया सरकार र विपक्षी दुबैले सहयोग गर्नुपर्ने अमेरिकी विदेशमन्त्री केरीले बताए ।
रुसका विदेशमन्त्री लाभरोभले सहमतिकाबारेमा सिरिया सरकारलाई जानकारी गराएको र उसले गम्भीरता देखाएको बताएका छन् ।
सिरियाली विपक्षीलाई अमेरिकाले सैन्यसहितको सहयोग गर्दै आएको छ भने रुसले राष्ट्रपति बसर अल असद पक्षलाई सहयोग गर्दै आएको छ । जसका कारण अमेरिका र रुसबीच तनाव बढेको थियो । (एजेन्सी)
भाद्र २५ गते, २०७३ मा प्रकाशित
