-कोमल भट्ट
चन्द्रागिरी नगरपालिका,
वा.नं.२१- पुरानो नैकाप
काठमाडौँ
हाल:- न्युयोर्क
न सूर्यले रोक्छु अकास भन्छ
न सिन्धु फैलाउँछु त्रास भन्छ
विशाल गर्दैन घमण्ड कैले
निकृष्ट गर्जेर म खास भन्छ
हुँदैन माया ममता नशामा
भुलेर संसार गिलास भन्छ
नगर्नु विश्वास दुराशयीको
छकाउँदै छर्छु मिठास भन्छ
कतै छ ऐश्वर्य छचल्किएको
कतै रुँदै गाँस,कपास भन्छ
खराबले ठान्छ सबै नराम्रो
प्रणाम गर्दा उपहास भन्छ
कुरा खुदै गर्छ सदैव हावा
तथापि अर्को छ बतास भन्छ
गएन सामन्त विचारधारा
गरीबलाई अझ दास भन्छ
निराशले सोच्छ मिलेन केही
र आसले गर्नु प्रयास भन्छ
विदीर्ण भो ‘कोमल’ जिन्दगानी
कठोर ज्यादै छ प्रवास भन्छ
उपेन्द्रवज्रा छन्द
(५ अक्षरमा विश्राम)
पौष ८ गते, २०७३ मा प्रकाशित
