बुटवल ( अर्घाखाँचीडट्कम) । पूर्वपश्चिम राजमार्गअन्तर्गत् रुपन्देहीको सैनामैना नगरपालिकामा मंगलबार भएको सवारी दुर्घट्नामा अर्घाखाँचीको मालारानी गाउँपालिका स्थित हंसपुरका एक दम्पतीको मृत्यु भएको छ ।
रुपन्देहीको सैनामैनामा भएको सवारी दुर्घटनामा अर्घाखाँची जिल्लाको मालारानी गाउँपालिका वार्ड – ७ हंसपुर (साविक: हंसपुर – ७ बाम्रुक) घर भै हाल रुपन्देही मुर्गीयामा बसोबास गर्दै आएका ४८ वर्षीय नारायण खनाल र उनकी ३२ वर्षीया श्रीमती कमला खनालको मृत्यु भएको हो ।
लु९प ४४८८ नम्बरको मोटरसाइकललाई पश्चिमबाट पूर्वतर्फ आइरहेको लु१ज २२३० नम्बरको माइक्रोबसले सैनामैना-२ झारगैरामा ठक्कर दिँदा खनाल दम्पतीको ज्यान गएको हो । खनाल दम्पतीका एक छोरा, छोरी र बुवा आमा छन् ।
यस्तै दुर्घटनामा दुईजना घाइते भएका छन् । सोही माइक्रोबसले एक साइकललाईसमेत ठक्कर दिँदा दुईजना घाइते भएका छन् । ठक्करबाट साइकलमा सवार स्थानीयवासी नरेश ठाकुर र उनकी छोरी पश्चिमा घाइते भएको प्रहरी कार्यालयले जनाएको छ ।
बाटो मोड्नेक्रममा माइक्रोबसले ठक्कर दिएपछि गम्भीर घाइते भएका खनाल दम्पतीको उपचारकाक्रममा लुम्बिनी अञ्चल अस्पताल बुटवलमा मृत्यु भएको थियो । ठक्कर दिने माइक्रोबस प्रहरीको नियन्त्रणमा छ ।
चैत्र २ गते, २०७३ मा प्रकाशित
