सन्धिखर्क, अर्घाखाँची ३१आस्विन ( अर्घाखाँचीडट्कम) । हिन्दुहरुको महान चाड शुभ दिपावली (तिहार) २०७४ को पहिलो दिन काग तिहारको अवसर पारेर रेडियो देउराली १०१ मेगाहर्ज अर्घाखाँचीले रेडियोको अन एयर बाटै काग सम्मेलन गरेको छ ।
विभिन्न पशुपंक्षिको हुबहु आवाज निकाल्ने प्रतिभा भएका, जिल्ला युवा प्रतिभा पुरस्कार बाट समेत सम्मानित भएका रेडियो देउरालीका कार्यक्रम प्रस्तोता भुवनेश्वर अधिकारीले रेडियोको अनएयर बाट प्रत्यक्षप्रसारण मार्फत कागको आवाज निकाली कराउदा रेडियो देउरालीको स्टुडियो रहेको भवनमा राखिएको स्पिकरबाट आवाज सुनेर कागहरु वरिपरि उड्दा आसपासका जनसमुदाय समेतले रमाइलो मान्दै घर घरको छत बाट अवलोकन गरेका थिए ।
त्यस्तै कार्यक्रमको सुचना पाएर १०१ मेगाहर्ज बाट समेत गाउँ बस्तिमा आवजलाई ठूलो भोल्युममा बजाएर राख्दा आफ्नो घर आगनमा समेत कागहरु आइरहेको विभिन्न स्थानबाट रेडियोको स्टुडियोमा फोन गरेर स्रोताले जानकारी गराएका थिए ।
यसरी रेडियो बाटै काग सम्मेलन गरेको देशमै पहिलो पटक भएको रेडियो देउरालीका कार्यक्रम प्रमुख कमल बिष्टले दाबी गर्नुभयो ।उक्त कार्यक्रमलाई रेडियो अर्घाखाँचीले समेत प्रसारण गरेको थियो ।
आश्विन ३१ गते, २०७४ मा प्रकाशित
