अर्घाखाँचीडट्कम संवाददाता
तम्घास, अर्घाखाँची (अर्घाखाँचीडट्कम) । बुटवलबाट तम्घास आउँदै गरेको बा ४ ख ५५०१ नम्बरको माइक्रो जिप सोमबार गुल्मी दरबार गाउँपालिका-४ बीरबास नजिकै दुर्घटना हुँदा अर्घाखाँची जिल्लाको छत्रदेव गाउँपालिका-७ भगवतीका रामप्रसाद पाण्डे सहित ११ जनाको मृत्यु भएको छ । ६ घाइते छन् ।
भगवतीका ४३ वर्षीय रामप्रसाद पाण्डे बुटवलबाट तम्घास जाने गाडीमा छाडेका थिए ।
यस्तै घटनामा मालिका गाउँपालिका-६ अर्जैका २५ वर्षीय लालबहादुर मुखिया, इश्मा गाउँपालिका-१ हस्तिचौरकी यमुना मरासिनी, इश्मा गाउँपालिका-२ दर्लामचौरका ४५ वर्षीया रुमी नेपाली, इश्मा गाउँपालिका-६ अमरपुरका २५ वर्षीय डिलबहादुर कुमाल, मुसिकोट नगरपालिका-३ बडागाउँकी ५२ वर्षीय मानकुमारी थापा, ब्रिटिस सेनामा कार्यरत बुटवलका केशबहादुर गुरुङको घटनास्थलमै मृत्यु भएको प्रहरी उपरीक्षक अनुरागकुमार द्वेवेदीले बताए ।
घटनामा माइक्रो जिप चालक रेसुंगा नगरपालिका १० सिमिचौरका भीमबहादुर घर्ती मगर र रुरु गाउँपालिका-६ रिमुवाकी सुमित्रा दर्लामीको उपचारका लागि पाल्पा लैजाने क्रममा मृत्यु भएको थियो । घाइते ८ मध्ये २ बालिकाको मिसन अस्पताल र अन्य ६ जनाको लुम्बिनी मेडिकल कलेज प्रवास पाल्पामा उपचार भइरहेको छ । उपचारका लागि पठाइएका घाइतेमध्ये थप १ को अवस्था गम्भीर छ ।
यस्तै उपचारको क्रममा मालिका गाउँपालिका-७ का १९ वर्षीय सुमन कार्की र इश्मा गाउँपालिका-६ अमरपुरका २४ वर्षीय बीरबहादुर कुमाल रहेका छन् ।
रिडी तम्घास खण्डको साँघुरो घुम्तीमा तीव्र गतिमा आइरहेको जिप विपरित दिशाबाट गएको लु १ च ४५२२ नम्बरको जिपसँग ठक्कर खाएछि अनियन्त्रित भइ दुर्घटनामा परेको हो ।
घुम्तीबाट उछिट्टिएको जिप सडकबाट झण्डै ५ सय मिटर तल खसेको छ । प्रहरीका अनुसार घटनास्थलमै ६ र उपचारका लागि पाल्पा लैजाने क्रममा बाटोमै ५ जनाको मृत्यु भएको हो ।
घटनास्थल निकै अप्ठ्यारो र धेरै तल खसेपनि स्थानीय र सशस्त्र प्रहरीले तत्काल उद्दार गरेका थिए ।
कार्तिक १३ गते, २०७४ मा प्रकाशित
