एमाले र माओवादी केन्द्र अर्घाखाँची – काठमाडौं सम्पर्कमञ्को संयुक्त बाम भेला सम्पन्न, पाँच वर्ष भित्रमा अर्घाखाँचीका ग्रामिण सडक कालोपत्रे गरिछाड्ने टोपबहादुरको प्रतिबद्धता (तस्बिर सहित)

माओवादी केन्द्रका नेता टोपबहादुर रायमाझीले पाँच वर्ष भित्रमा अर्घाखाँचीका साविकका ४२ वटै गाविसमा पुग्ने मोटरबाटो कालोपत्रे गरिछाड्ने प्रतिबद्धता जाहेर गरेका छन् । उनी अर्घाखाँचीबाट वाम गठबन्धनका तर्फबाट प्रतिनिधिसभाका उम्मेदवार हुन् ।

नेकपा एमाले अर्घाखाँची-काठमाडौं सम्पर्क मञ्च र नेकपा माओवादी केन्द्र अर्घाखाँची-काठमाडौं संघिय जनसम्पर्क मञ्चले आइतबार साँझ राजधानीमा आयोजना गरेको संयुक्त वाम भेलामा बोल्दै नेता रायमाझीले उक्त कुरा बताएका हुन् ।

‘जसरी अर्घाखाँचीका तत्कालिन ४२ वटै गाविसलाई सडक सञ्जालले जोडिएको थियो ठिक त्यसै गरी ५ वर्ष भित्रमा ४२ वटै गाविस छुने सडक कालोपत्रे गरि नयाँ रेकर्ड राखिने’ उनले बताए । सबै गाविसमा सडक पुग्ने देशकै पहिलो जिल्ला अर्घाखाँची भएको रायमाझीले बताए । ‘जिल्लाका सबै वार्डमा  सडक कालोपत्रे हुने पहिलो जिल्ला पनि अर्घाखाँची नै बन्ने छ’ उनले उद्घोष गरे ।

नेता रायमाझीले आफूले निर्वाचन जितेर आएपछि अर्घाखाँचीलाई देशकै नमुना जिल्ला बनाउने प्रतिबद्धता जाहेर गरे । विकासको नमुना हेर्न कहाँ जाने ? भनेर कसैले प्रश्न गरेमा त्यसको उत्तर अर्घाखाँची भन्ने हिसाबले काम गरिने बताए । समग्र भित्र विशिष्टिकरण गरेर जिल्लाको विकास गर्नुपर्नेमा उनले जोड दिए ।

५ वर्ष भित्रमा जिल्लाका सबै वडामा खानेपानीको श्रोत परिचालन गरी घर-घरमा पानीका धारा जडान गरिने उनले बताए । काठका पोल विस्थापित गरिने र जिल्लालाई लोडसेडिङ मुक्त गरिने उनले बाचा गरे । ‘जिल्लामा स्वास्थ्य, शिक्षा र रोजगारका विषयलाई प्रमुख प्राथमिकता दिएर काम गर्ने छु’ उनले भने ।

एमाले अध्यक्ष केपी शर्मा ओली र एमाओवादी केन्द्रका अध्यक्ष पुष्पकमल दाहाल ‘प्रचण्ड’ बाम गठबन्धनका साझा नेता भएको उनले बताए । ‘बाम गठबन्धन गर्ने कुरा २०६४ बाट सुरु भएको हो । त्यतिबेला बाम गठबन्धन गर्ने कुरा चलेपनि युद्ध लडेर आएको माओवादी र जनाधार राम्रो भएको एमालेबीच कुरा नमिल्दा हुन सकेन’ उनले स्मरण गर्दै भने ।

अहिले भएको बाम तालमेल स्थानिय निकायको निर्वाचन हुनुभन्दा अघि भएको भए देशै कब्जा हुने उनले बताए । ढिलै भएपनि यो तामेल निकै महत्व र अर्थपूर्ण रहेको उनको ठम्याई छ ।

एमाले र माओवादीबीच मतान्तर नभएका होइनन्, ति मतान्तरलाई एकिकृत गर्न चुनावी तालमेल गर्नुपरेको नेता रायमाझीले स्पष्ट पारे । ‘पौडि खेल्न परेपछि किन खोला, पोखरी वा कुवामा खेल्ने ? रारा तालमै गएर खेल्ने भन्ने ठानेर बाम एकता गरिएको’ उनले बताए ।

नेता रायमाझीले प्रतिनिधिसभा र प्रदेशसभाको निर्वाचन पछि एमाले र माओवादीबीच पार्टी एकता हुने ठोकुवा गरे । बाम गठबन्धन चुनावी तालमेलका लागि मात्र नभएर पार्टी एकता गर्नका लागि भएको उनले बताए । गठबन्धनलाई दुइ तिहाइ बहुमत आउने हिसाबले निर्वाचनमा परिचालन हुन उनले कार्यकर्तालाई निर्देशन दिए । निर्वाचन पछि देशमा ठूलो परिवर्तन आउनेमा आफू विश्वस्त रहेको रायमाझीले बताए ।

अहिलेको पिँढी भाग्यमानी भएको उनको ठहर छ  । ‘हाम्रै पालामा राजसंस्था ढल्यो । नयाँ संविधान बन्यो । अब संविधान कार्यान्वयनको अन्तिम चरणमा छ । एक हिसाबले राजनीतिक क्रान्ति सम्पन्न भएको छ । अब आर्थिक समृद्धि हुन बाँकी छ । त्यो पनि हाम्रै पालामा होला जस्तो छ’ उनले भने । आर्थिक समृद्धिका लागि शक्ति चाहिन्छ त्यो शक्ति बाम एकतामा रहेको उनले बताए । एउटै कम्युनिष्ट केन्द्र बनेपछि देश समृद्धिको दिशामा अघि बढ्छ उनले भने ।

नेता रायमाझीले जिल्लामा रेल मार्ग विस्तार गरी रेल गुडाउने आफुको सपना रहेको बताए । चीनले पोखरा हुँदै लुम्बिनीसम्म रेलमार्गले जोड्ने भनेको स्मरण गर्दै उनले भने, ‘अर्घाखाँचीमा पनि पोखरादेखि रेलमार्ग विस्तार गर्न सकिन्छ ।’ 

उनले कल्पना गदै भने, ‘पोखराबाट स्याङजा हुँदै आँधीखोला, त्यहाँबाट रिडि जोड्ने । रिडिबाट गैरीखुट्टा, खरज्याङ हुँदै दुर्गाफाँट भएर जिल्लामा रेलमार्ग विस्तार गर्न सकिन्छ ।’ त्यसका लागि सुरुङमार्ग निर्माण गर्दै अघि पढ्नुपर्छ ।

यसै कार्यक्रममा बोल्दै अर्घाखाँची प्रदेशसभा क्षेत्र नम्बर- १ का एमाले उम्मेदवार चेतनारायण आचार्यले आफूले निर्वाचन जितेपछि जनताको हलि भएर काम गर्ने प्रतिबद्धता ब्यक्त गरे । उनले आफूलाई मतदान गर्ने मतदाताको शिर झुक्न नदिने गरी काम गरेर देखाउने बाचा गरे ।

निर्वाचन जितेपछि जनताका काम सेवक भएर पुरा गर्ने आचार्यले बताए । ‘अर्घाखाँचीमा कतैबाट पनि कांग्रेसलाई चुनावी दाउ नलाग्ने ठोकुवा गर्दै उनले भने बाम एकताले जिल्लामा निर्वाचनको उत्साह बढेको छ र कांग्रेसीहरु अत्ताल्लिएका छन्’ । आचार्य एमाले जिल्ला अध्यक्ष हुन् ।

अर्घाखाँचीको प्रदेशसभा क्षेत्र नम्बर-२ बाट एमाले उम्मेदवार बनेका रामजी घिमिरेले जिल्लामा बाम गठबन्धनको जित निश्चित भएको ठोकुवा गरे । जित निश्चित भएपनि निर्वाचनमा एकजुट भएर लाग्न उनले सम्पूर्ण बाम कार्यकर्तालाई आह्वान गरे । बाम गठबन्धनले देशैभर जितेपछि दिल्लीको आदेश स्विकार गर्नु नपर्ने घिमिरेले बताए । निर्वाचनपछि प्रतिपक्षमा बस्नुपर्ने भएकाले कांग्रेसको निन्द्रा खल्बलिएको उनले आरोप लगाए।