अफगानिस्तानको दक्षिणी प्रान्त कान्दाहारमा अफगानिस्तानको प्रहरी र सेनासहितको संयुक्त सैन्य समूहले शुक्रबार बिहान गरेको कारबाहीमा परी कम्तीमा १७ जना तालिबान लडाकूहरु मारिएको समाचारमा जनाइएको छ ।
शुक्रबार बिहान सबेरै कान्दाहार प्रान्तको सहर ए सफा जिल्लाको सीमा प्रहरी बल र सेनाको कारबाहीमा १७ जना तालिवान मारिएको समाचारमा जनाइएको छ ।
यस कारबाहीमा १७ तालिवान आतंककारी घटनास्थलमा नै मारिनुका साथै अन्य ६ घाइते भएका अफगानिस्तानको गृह मन्त्रालयले सिन्ह्वा समाचार समितिलाई जानकारी दिएको छ ।
यस कारबाहीको क्रममा प्रहरीले तालिवानको हातहतियार समेत कब्जा गरेको बताइएको छ । उनीहरु लुकेर बसेको आश्रयस्थलमा यो कारबाही भएको थियो ।
यस क्षेत्रमा सक्रिय रहेका तालिवान आतंककारी समूहले भने यस कारबाहीको विषयमा कुनै टिप्पणी गरेका छैनन् । तालिबानहरुले पछिल्लो समयमा कान्दाहार क्षेत्रमा आतंक मच्चाएको सूचनाको आधारमा यो कारबाही भएको समाचारमा जनाइएको छ ।
गतहप्तामात्र पनि तालिबानहरुले कान्दाहारको एक प्रहरी चौकीमा आक्रमण गरी कैयौं सुरक्षाकर्मीको ज्यान लिएका थिए । सो क्षेत्रमा अहिले प्रहरीले गस्ती बढाएको जनाएको छ । (रासस/सिन्ह्वा)
मंसिर ८ गते, २०७४ मा प्रकाशित
