सितापुरको फलाचौरको घुम्तीमा जिप दुर्घटना हुँदा १३ जना घाइते

अर्घाखाँची । अर्घाखाँचीको  सितगंगा नगरपालिका वडा नं.२ सितापुरको फलाचौरको घुम्तीमा जिप दुर्घटना हुँदा १३ जना घाइते भएको जिल्ला प्रहरी कार्यालयले  जनाएकाे छ । देउराली यातायात व्यवसायी समितीको लु १ ज २३६९  नम्बरकाे  जिप आज विहान ४ बजे  दुर्घटनामा परेको हो ।

मालारानी गाउँपालिका वडा नं. ६ हंसपुरका ८८ बर्षीय ज्ञानधर पुनले जिवित छँदा आफ्नो अन्तिम संस्कार नवलपरासीको त्रिबेणीमा गरिदिनु भनेकाले उनलाई त्रिवेणी लगिएको थियो । पुनकाे अन्तिम संस्कार गरी फर्कने क्रममा उक्त दुर्घटना भएको मालारानी गाउँपालिका वडा नं. ६ का वडा अध्यक्ष नारायणप्रसाद अर्यालले बताए ।

घाइतेको ठाडा प्राथमिक स्वास्थ्य केन्द्रमा सामान्य उपचार पछि लुम्बिनी अञ्चल अस्पताल बुटवल रिफर गरिएको छ । घाइते मध्ये ६ जनाको अबस्था गम्भीर रहेको बताईएको छ ।

गम्भीर घाइते हुनेहरुमा ३६ बर्षका विकाश केसी, २८ बर्षका बालकृष्ण शाह, २७ बर्षका सुरज पुन, ४८ बर्षका उदय पुन, ४५ बर्षका शिव बहादुर घर्तिमगर र ४८ बर्षका बोम बहादुर पुन रहेको ईलाका प्रहरी कार्यालय ठाडाका प्रहरी निरीक्षक कमल परियारले जानकारी दिए ।

सामान्य घाईते हुनेहरुमा यज्ञ बहादुर पुन, टिकाराम पुन, नर बहादुर पुन, भोबिश पुन, अर्जुन पुन, ज्ञान बहादुर पुन र नारायण अधिकारी रहेको प्रहरीले जनाएको छ ।