ओखलढुंगामा स्कार्पिओ जीप दुर्घटनामा ज्यान गुमाएका सबै ६ जनाको सनाखत भएको छ ।
आज दिउँसो जिल्लाको मानेभञ्ज्याङ्ग गाउँपालिका–६ हिलेपानी नजिकै भडारे खोलामा स्कार्पियो दुर्घटनामा ज्यान गुमाएका सबै ६ जनाको सनाखत भएको हो ।
दुर्घटनामा ताप्लेजुङको ओलाङचुङगोलाका ५५ वर्षीय मिङ्मा शेर्पा, ताप्लेजुङको फत्तालुङका ४५ वर्षीय साम्गेल शेर्पा, काठमाडौं बौद्धका ४० वर्षीय ङवाङ सेर्तुङ शेर्पा, सोही ठाउँका ३५ वर्षीय नोर्बु शेर्पा, वाङ्दा शेर्पा र डोमा शेर्पाको मृत्यु भएको जिल्ला प्रहरी कार्यालय ओखलढुंगाका प्रहरी निरीक्षक राजीव श्रेष्ठले जानकारी दिए ।
उनका अनुसार ज्यान गुमाएकामध्ये चार पुरुष र दुई महिला छन् । सोलुखुम्बुको जुनबेँसी गुम्बाबाट पूजापाठ गरेर काठमाडौं फर्कंदै गरेको बा१६च २२०७ नम्बरको जीप दुर्घटनामा परेको थियो । जीप सडकबाट करीब दुई सय मिटर तल खसेको थियो ।
दुर्घटनामा परी चालक कृष्ण श्रेष्ठसहित तीनजना गम्भीर घाइते भएका छन् । घाइतेको उदयपुरको घुर्मीमा उपचार सम्भव नभएपछि थप उपचारका लागि काठमाडौं पठाइएको छ । (रासस)
चैत्र १७ गते, २०७५ मा प्रकाशित
