बुटवल, पाखापानीमा बिहीबार भएको सवारी दुर्घटनामा एक युवतीको मृत्यु भएको छ ।
मृत्यु हुनेमा बुटवल–१२, तामनगरका २० वर्षीया पुष्पा भण्डारी रहेको इलाका प्रहरी कार्यालय बुटवलका प्रहरी हवल्दार भोजप्रसाद पाण्डेले जानकारी दिए ।
दुर्घटनामा परी पुष्पाका बुवा ४७ वर्षीय घनश्याम भण्डारी घाइते भएका छन् । उनको अवस्था सामान्य रहेको प्रहरीले जनाएको छ ।
बुटवलबाट पश्चिमतर्फ जाँदै गरेको लु१ख ६२३३ नम्बरको टिपरले पश्चिमबाट बुटवलतर्फ आउँदै गरेको लु४५प ७२३४ नम्बरको स्कुटरलाई पाखापानीको मनकामना मन्दिरनजिकै ठक्कर दिँदा सो दुर्घटना भएको थियो ।
टिपर र त्यसका चालकलाई नियन्त्रणमा लिएको प्रहरीले जनाएको छ । रासस
बैशाख १९ गते, २०७६ मा प्रकाशित
