गर्मी बढेपछि जतासुकै डेंगीका बिरामी भेटिन थालेपछि अस्पतालहरु भरिभराउ भएका छन् ।
करिब एक महिनाअघि देखापरेको डेंगीरोग नियन्त्रणको प्रयास भएपनि त्यो सार्थक हुन नसक्दा संन्त्रास फैलिएको छ ।
गत वैशाख ३१ गते सुनसरीको धरान उपमहानगरपालिका–१५ मा पहिलोपटक डेंगीका बिरामी फेलापरेका थिए ।
अहिले इटहरी, बराहक्षेत्रसहित मोरङका सुन्दर–हरैंचा, पथरी–शनिश्चरे हुँदै विराटनगर महानगरपालिकामासमेत डेंगी संक्रमित फेलापरेका छन् ।
प्रदेश नम्बर–१ को सामाजिक विकास मन्त्रालयले सुनसरी र मोरङमा ५०० बढी डेंगीका बिरामी फेलापरिसकेको जनाएको छ ।
लामखुट्टेको टोकाइबाट सर्ने डेंगीरोग नियन्त्रण हुनेभन्दा पनि फैलने अवस्थामा रहेको स्वास्थ्य महाशाखा विराटनगरका अधिकृत सुवास नेपाल बताउँछन् ।
सुनसरीको धरानमा सबैभन्दा बढी डेंगीका बिरामी देखिएका छन् । धरानस्थित बीपी कोइराला स्वास्थ्य विज्ञान प्रतिष्ठानमा बिरामीको संख्या बढ्दो छ ।
प्रतिष्ठानमा एक हजारजनाको रगत परीक्षण गर्दा ४५७ जनामा संक्रमण भेटिएको छ ।
धरान उपमहानगरपालिका वडा नम्बर–१५ र १८ लाई डेंगी संकटग्रत घोषणा गरी ‘रेपिड रेस्पोन्स’ टिम निर्माण गरी घरदैलो गर्नेलगायतका काम भइरहेको धरान उपमहानगरपालिकाका कार्यवाहक मेयर मञ्जु सुवेदीले जानकारी दिइन् ।
डेंगीको संक्रमण फैलिएपछि रोग परीक्षण गर्ने किटकोसमेत अभाव हुन थालेको छ ।
धरानमा संक्रमण फैलिएपछि मोरङका सुन्दर–हरैंचा, बेलबारी, पथरी र उर्लाबारी नगरपालिकाले सरसफाइ तथा लामखुट्टे मार्ने अभियान सुरु गरेका छन् ।
स्वास्थ्य निर्देशक भोगेन्द्र डोटेलको नेतृत्वमा झापा, मोरङ र सुनसरीका प्रमुख जिल्ला अधिकारीसँग समन्वय गरेर डेंगी नियन्त्रणमा खटिने कार्ययोजना तयार गरी सचेतनासँगै औषधि छर्कने काम भइरहेको सामाजिक विकास मन्त्रालयका सचिव हरिप्रसाद दाहालले जानकारी दिए ।
डेंगीको संक्रमण फैलिएपनि अहिलेसम्म कसैको मृत्यु भने भएको छैन ।
जेष्ठ ३१ गते, २०७६ मा प्रकाशित
