अर्घाखाँचीडट्कम संवाददाता
चुत्राबेसी, अर्घाखाँची । अर्घाखाँचीको सन्धिखर्क नगरपालिकाका नगर प्रमुख कमल प्रसाद भुसालले घरमै पुगेर १ सय बर्षिय बृद्धलाई सम्मान गर्नु भएको छ ।
ज्येष्ठ नागरिक समाजका गहना भएको मुल्यांकन गर्दै सन्धिखर्क नगरपालिका वार्ड नम्वर २ चुत्राबेसीको घोचेखोला निवासी १ सय बर्षिय डिलाराम भुसाललाई घरमै पुगेर सम्मान गरिएको हो ।
बृद्धलाई दोसल्ला ओढाएर तथा एक वटा ब्लांकेट प्रदान गरेर नगर प्रमुख कमल प्रसाद भुसालले सम्मान गर्नु भएकोे होे । बृद्ध सम्मान गर्दै नगर प्रमुख भुसालले ज्येष्ठ नागरिकहरु धेरै विषयमा जानकार भएको बताउनु भयो । उहाँले ज्येष्ठ नागरिकहरुको हक र हितमा सन्धिखर्क नगरपालिका रहेको बताउदै उहाँहरुलाई दिनु पर्ने सेवा सुविधा दिन आफुहरु सधैभर अग्रसर भएको जानकारी दिनुभयो ।
यस्ते सन्धिखर्क नगरपालिकाकै वडा नम्वर ८ किमडाँडामा ९९ वर्षीया वृद्धा बालिकला घर्तीलाई सम्मान गरिएको छ ।
कार्यक्रममा सन्धिखर्क नगरपालिकाका नगर प्रमुख कमल प्रसाद भुसाल, वडा नम्वर ८ का वडा अध्यक्ष इश्वरी प्रसाद भुसाल, वडा सदस्य नारायण प्रसाद अर्याल, नेपाल पत्रकार महासंघका प्रदेश सदस्य प्रेमनारायण आचार्य, किमडाडा स्वास्थ्य चौकी इन्चार्ज प्रकाश परियार लगायतले मन्तब्य राख्नु भएको थियो । कार्यक्रम पुस्पा भुसालको सञ्चालनमा सम्पन्न भएको हो ।
तस्बिर, समाचार स्रोत: प्रेम नारायण आचार्य
आश्विन १६ गते, २०७७ मा प्रकाशित
