वाङ्लामा जेष्ठ नागरिक तथा अपाङ्ग ब्यक्तिहरुलाई सम्मान कार्यक्रम सम्पन्न (फोटो सहित)

वाङ्ला, अर्घाखाँची (अर्घाखाँचीडट्कम) । अर्घाखाँची जिल्लाको सन्धिखर्क नगरपालिका वार्ड नम्बर ४ वाङ्लामा जेष्ठ नागरिक तथा फरक क्षमता भएका अपाङ्ग ब्यक्तिहरुलाई सम्मान कार्यक्रम सम्पन्न भएको छ । 

आर्थिक वर्ष २०७७/०७८ बाट स्वीकृत कार्यक्रम अनुसार वाङ्लामा वार्ड नम्बर ४ को आयोजनामा शनिबार जेष्ठ नागरिक तथा फरक क्षमता भएका अपाङ्ग ब्यक्तिहरुलाई सम्मान कार्यक्रम सम्पन्न भएको हो ।

कार्यक्रममा नगर प्रमुख कमल प्रसाद भुसालले जेष्ठ नागरिक तथा अपाङ्ग ब्यक्तिहरुलाई सम्मान गर्नुभएको थियो ।  उक्त कार्यक्रममा मन्तव्य राख्दै सन्धिखर्क नगरपालिकाका नगरप्रमुख कमल प्रसाद भुसालले नगरबासिहरुको हितमा रहेर नगरले काम गरिरहेको बताउनुभयो । नगरपालिकाभित्र रहेका ज्येष्ठ नागरिक र फरक क्षमता भएका व्यक्तिहरुका लागि आगामी आर्थिक वर्षमा थप कार्यक्रम नगरले ल्याउने बताउनु भयो । 

कार्यक्रममा नगर उपप्रमुख ठाकुर कुमार बिक, प्रमुख प्रशासकिय अधिकृत कृष्ण प्रसाद सापकोटा, नेपाली काङ्ग्रेस नगर सभापती विनोद आचार्य लगायतले शुभकामना मन्तव्य राखेका थिए ।