एजेन्सी ।
अफगानिस्तानमा तालिवान विद्रोही तीव्र गतिमा राजधानी काबुलतर्फ बढेपछि त्यहाँस्थित विदेशी कूटनीतिक नियोगहरु हतास मनस्थितिमा पुगेका छन् ।
शुक्रबार विद्रोहीहरुले राजधानीबाट ८० किलोमिटर पर रहेको लोघार प्रान्तको राजधानी पुल–ए–अलाम कब्जा गरेपछि कूटनीतिक नियोगहरु काबुल छाड्ने हतारोमा लागेका हुन । अमेरिकाले आफ्ना कर्मचारीहरुको उद्धारका लागि सेनाको पहिलो खेप अफगानिस्तान पठाईरहेको छ भने अन्य पश्चिमा मुलुकहरुले पनि आफ्ना कर्मचारीहरुलाई त्यहाँबाट निकाल्ने प्रक्रिया शुरु गरिसकेका छन् ।
काबुलस्थित राष्ट्रसंघीय नियोगका प्रमुखले परिस्थिति निकै तीव्र गतिमा परिवर्तन भईरहेको र नियन्त्रण बाहिर गईरहेको बताएका छन् । अमेरिकी रक्षा मन्त्रालयका प्रवक्ता जोन कर्बीले अफगानिस्तानको अवस्थाको सुक्ष्म निगरानी गरिरहेको भन्दै तत्कालै काबुलमा विद्रोहीले कब्जा जमाउने संभावनालाई भने अस्वीकार गरेका छन् ।
तर एक महिना भित्र राजधानी काबुल विद्रोहीको कब्जामा पुग्नेमा भने उनी पनि सहमत देखिएका छन् । अमेरिकाले आफ्ना कर्मचारी र नागरिकहरुको सुरक्षा र उद्धारका लागि यसै साताको अन्त्यसम्म ३ हजार फौजा त्यहाँ उतार्ने पनि पेन्टागनका प्रवक्ताले बताएका छन् । बेलायतले कूटनीतिक कर्मचारीको उद्धारका लागि ६ सय सेना पठाउँदै छ भने जर्मनी, डेनर्माक र नर्वेले पनि उद्धारको काम अघि बढाईसकेका छन् ।
श्रावण ३० गते, २०७८ मा प्रकाशित
