प्रकाश प्युठानी
सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लामा नेपाली कांग्रेसको आसन्न महाधिवेशनको मिती नजिकिएसँगै चहलपहल बढेको छ ।
नेपाली काँग्रेसको १४ औँ महाधिवेशनमा जिल्ला सभापति पदमा युवानेता इन्द्रमणि पौडेलले उम्मेदवारी घोषणा गरेका छन् । ३८ वर्षिय युवानेता पौडेल काँग्रेसको १३ औँ महाधिवेशनमा अत्यधिक मतका साथ महाधिवेशन प्रतिनिधीमा विजयी भएका थिए ।
३÷४ जना सभापति पदमा आकांक्षी रहेको अर्घाखाँचीमा कांग्रेस हाँक्ने जिम्मेवारीको बाजी कसले मार्ला भनेर यतिबेला चर्चा सुरु भएको छ । २०३९ सालमा साविक धातिवाङ्ग गाविस वडा नं. ६ मा जन्मिएका पौडेल सानै उमेरदेखी नै नेविसंघ, तरुणदल हुदैँ काँग्रेसको राजनितीमा सक्रिय भएका हुन ।
‘मैले नेपाली कांग्रेसको आगामी १४ औँ महाधिवेशनमा जिल्ला सभापतिमा चुनाव लड्नका लागी घोषणा गरिसकेको छु ।’ आम जिल्लाबासीको चाहना अनुसार पुराना नेता र अग्रजहरूलाई सम्मान गर्दै युवाले नेतृत्व लिनुपर्छ भन्ने उद्देश्यका साथ मैले जिल्ला सभापति भई काम गर्ने तयारी गरेको छु पौडेलले भने ।
बेरोजगार युवाहरूलाई आफ्नै ठाउँमा रोजगारी वा स्वरोजगार उद्यमशीलतामा समाहित गर्नुपर्छ भन्ने मुख्य उद्देश्यका साथ युवाहरूलाई आयमूलक कार्यमा व्यस्त बनाउँदै काँग्रेसको संगठनलाई मजवुद बनाउँने दायित्व रहेको पौडेलले बताए । ‘युवाहरूलाई देशभित्रै राख्न सकेमा आगामी निर्वाचनमा युवाको महत्व बढी हुने भएका कारण प्राथमिकतामा राखेको पौडेलले बताए ।’
सामान्य परिवारमा जन्मेका पौडेलले अर्घाखाँचीमा गैरसरकारी संस्था मार्फत धेरै युवाहरुलाई स्वरोजगार बनाएका छन् । संस्थापन ईतर समुहका पौडेल भन्छन् ‘राजनीति पाका उमेरकले मात्र गर्नुपर्छ भन्ने कुरा हुँदैन । बिपी कोइराला ४५ वर्षको उमेरमा प्रधानमन्त्री बन्नुभएको थियो । म पनि सानै उमेरदेखि राजनीति र सामाजिक क्षेत्रमा क्रियाशील भएका कारण पनि पार्टीको संगठन चलाउने क्षमता छ । नयाँ प्राविधिक युगसँगै पार्टी सञ्चालन गर्ने तरिका पनि प्रविधिमैत्री हुनुपर्छ । सामाजिक क्षेत्रमा क्रियाशील रहँदा संघसंस्था सञ्चालन गर्ने ज्ञान र अनुभव पनि छ ।
सबै क्षेत्रबाट अवकाश लिएपछि राजनीतिमा आउनुपर्छ, भन्ने मान्यतालाई पनि म तोड्न चाहन्छु । अहिले धेरै युवाहरू राजनीतिमा आउनुभएको छ । यसले भोलिको राजनीतिक संस्कारलाई पनि परिवर्तन गर्न सहयोग गर्ने विश्वास लिर्दै जित सुनिश्चीत रहेको पौडेलको दाबी रहेको छ ।
भाद्र १५ गते, २०७८ मा प्रकाशित
