अर्घाखाँचीडट्कम संवाददाता
सन्धिखर्क, अर्घाखाँची (अर्घाखाँचीडट्कम ) । अर्घाखाँची जिल्लामा प्रहरीले चालक र सहचालकहरुको स्वास्थ्य परीक्षण कार्यक्रम संचालन गरेको छ ।
जिल्ला प्रहरी कार्यालय अर्घाखाँची र जिल्ला ट्राफिक प्रहरी कार्यालय अर्घाखाँचीको संयुक्त आयोजनामा प्रमुख जिल्ला अधिकारी हरि प्रसाद घिमिरेको प्रमुख आतिथ्यतामा आज मंगलवारबाट जिल्लाका चालक र सहचालकहरुको स्वास्थ्य परीक्षण कार्यक्रम संचालन गरेको छ ।
कार्यक्रममा बिभिन्न सवारी साधनका १४१ जना चालक तथा सह- चालक हरुको स्वास्थ्य परीक्षण गरिएको थियोे । चालक र सहचालकहरुको स्वास्थ्य परिक्षणलाई जिल्लाभर निरन्तरता दिइने बताईएको छ ।
उता जिल्ला भित्र र बाहिर सवारी कुदाउने अधिकांश चालकहरुमा स्वास्थ्यमा समस्या भएको पाइएको हो ।
जिल्लामा सवारी साधान चलाउने पाका उमेरका सवारी चालकहरुको स्वास्थ्य परीक्षण गरेको देखिदैन । अर्घाखाँचीमा कयौ सवारी चालकहरु प्रेसरका समस्या भएका, नजिकको नदेख्ने, टाढाको नदेख्ने र रङ छुट्याउन नसक्ने जस्ता स्वास्थ्यमा समस्या रहेको देखिन्छ ।
आँखाको कमजोरी र उच्च रक्तचाप भएका चालकबाट दुर्घटनाको जोखिम हुने भएकाले दुर्घटना न्यूनीकरणका लागि स्वास्थ्य परीक्षण गर्नुपर्ने आवश्यक रहेको अधिकांश सवारी चालकहरुले अर्घाखाँचीडट्कमलाई बताए । साथै जिल्ला ट्राफिक प्रहरी कार्यालयले यसमा ध्यान दिनपर्ने उनिहरु बताउन्छन् ।
आँखामा कमजोरी देखिएका व्यक्तिलाई चश्मा लगाउन र रक्तचाप भएकाहरुलाई खानपानमा ध्यान दिई स्वास्थ्य व्यवस्थापन गर्न सल्लाह प्रदान गर्न लगायतका लागि बेला-बेलामा स्वास्थ्य परीक्षण आवश्यक रहेको बताईएको छ ।
पौष २० गते, २०७८ मा प्रकाशित
