अर्घाखाँचीडट्कम संवाददाता
सन्धिखर्क, अर्घाखाँची (अर्घाखाँचीडट्कम) । अर्घाखाँची जिल्लामा राष्ट्रिय परिचय वितरण संकलन कार्य र मतदाता नामावली संकलन कार्य स्थगित भएको छ ।
जिल्ला प्रशासन कार्यालय अर्घाखाँचीबाट हुँदै आएको राष्ट्रिय परिचय वितरण संकलन कार्य र निर्वाचन कार्यालयबाट गरिदै आएको मतदाता नामावली संकलन कार्य भोली शुक्रवारबाट स्थगित हुने भएको हो ।
जिल्ला प्रशासन कार्यालय अर्घाखाँचीले दिएको जानकारी अनुसार राष्ट्रिय परिचय वितरण संकलन कार्य र मतदाता नामावली संकलन कार्य गर्दा माक्स खोली फोटो लिनुपर्ने, भिडभाड र औठाछाप लगाउनु पर्ने हुँदा हालका लागि स्थगित गरिएको बताइएको छ ।
उता जिल्ला प्रशासनमा सेवा लिन आउने सबै सेवाग्राहीले कोरोना विरुद्धको खोप लगाएको कार्ड अनिवार्य गरिएको छ ।
जिल्ला प्रशासनमा गत माघ ७ गतेदेखि सेवा लिन आउने सबै सेवाग्राहीले कोरोना अर्थात कोभिड–१९ विरुद्धको खोप लगाएको कार्ड अनिवार्य गरिएको हो ।
सेवाग्राहीको कार्ड बाहिर गेटमा चेक गरेर मात्र भित्र प्रवेश दिईनेछ । भने कार्ड नभएकाले सेवा पाउने छैनन् ।
उता जिल्ला प्रशासन अर्घाखाँचीले कोरोना संक्रमण बढ्दै गएको भन्दै स्थानीय तहलाई राहदानी, नागरिता, राष्ट्रिय परिचय पत्र जनजाती, दलित प्रमाणिकरण लगायतका सम्पूर्ण सेवाहरु आलोपालो दिन शुरु गरेको छ ।
प्रशासनले जारी गरेको सुचना अनुसार पाणिनी गाउँपालिका, भूमिकास्थान नगरपालिका र शितगंगा नगरपालिकाका सेवाग्राहीहरुलाई आईतवार, मंगलवार र विहिवारको दिन छुट्टाईएको छ ।
यस्तै मालारानी गाउँपालिका, सन्धिखर्क नगरपालिका र छत्रदेव गाउँपालिकाका सेवाग्राहीहरुलाई सोमवार, बुधवार र शुक्रवारको दिन छुट्टाईएको छ ।
माघ १३ गते, २०७८ मा प्रकाशित
