अर्घाखाँचीमा स्थानीय तहको निर्वाचन २०७४ मा कसले कति मत पाएका थिए ? हेर्नुस्

सन्धिखर्क, अर्घाखाँची । स्थानियतह निर्वाचनको मिति नजिकिए संगै दलहरु दौडधुपमा लागेका छन् । निर्वाचन आफ्नो पक्षमा पार्न उम्मेद्वारहरु घरदैलो अभियान, पार्टी प्रवेश कार्यक्रम, रिसाएका कार्यकर्ता फकाउने कार्यमा व्यस्त देखिन्छन् ।

नेकपा एमाले एक्लै निर्वाचनमा गएको छ भने नेपाली कांग्रेस, नेकपा माओवादी केन्द्र, राष्ट्रिय जनमोर्चा र नेकपा एकिकृत समाजवादी गठबन्धन बनाएर चुनावी मैदानमा उत्रिएका छन् । प्रतिगमनलाई परास्त गर्न भन्दै केन्द्रले गरेको गठबन्धन अर्घाखाँचीमा पनी सोही अनुरुप अँगाडी बढेको छ । जिल्लाका सबै स्थानियतहमा एमालेलाई एक्लाउने गरी गठबन्धन गरिएको छ ।

गत २०७४ को स्थानिय निर्वाचनमा कांग्रेस र माओवादीले गठबन्धन गरेका थिए । मालारानी गाउँपालिकामा प्रमुख/उपप्रमुख र पाणिनी गाउँपालिकामा उपप्रमुख बाहेक अन्य तहमा एमाले शुन्य छ । वडाहरुमा भने एमालेले २५ स्थानमा विजय हासिल गरेको थियो । कुल ६१ वडा रहेको जिल्लामा नेपाली कांग्रेसले २५ वडा जितेको थियो ।

सन्धिखर्क नगरपालिकामा नेपाली कांग्रेसका उम्मेद्वार कमल प्रसाद भुसालले नेकपा एमालेका उम्मेद्वार कृष्ण प्रसाद श्रेष्ठलाई १ हजार १ सय तिन मतान्तरले पराजित गरेका थिए । कांग्रेस माओवादी तालमेल गर्दा कांग्रेसका भुसालले श्रेष्ठलाई ११ सय बढी मतान्तरले पछी पारेका थिए । भुसालले मेयरमा ८ हजार २ सय ३० मत पाउँदा श्रेष्ठले ७ हजार १ सय २७ मत पाएका थिए । यस्तै उपमेयरमा गठबन्धनका ठाकुर विकले एमालेकी ईश्वरा पोख्रललाई ९६१ मतान्तरले पछी पारेका थिए । विकले ७ हजार ३ सय ६५ मत ल्याउँदा पोख्रलले ६ हजार ४ सय ४ मत पाएकी थिईन् ।

शितगंगा नगरपालिकामा नेपाली कांग्रेसका उम्मेद्वार सुर्यप्रसाद अधिकारी १ हजार ६ सय ८७ मतान्तरले विजयी भएका थिए । उनका निकटतम प्रतिद्वन्दी नेकपा एमालेका बसन्त कुमार श्रेष्ठले ६ हजार ९ सय ९० मत पाउँदा कांग्रेसका अधिकारीले ८ हजार ६ सय ७७ मत ल्याएका थिए । यस्तै उममेयरमा नेकपा माओवादी केन्द्रका टिका रेश्मीले ७ हजार १ सय २८ मत ल्याएर विजयी भएका थिए । ९५ मतको झिनो हार व्यहोरेको एमालेकी गिता भाटले ७ हजार ३३ मत प्राप्त गरेकी थिईन् । शितगंगा नगरपालीकामा कांग्रेस माओवादी गठबन्धन बनाएर संयुक्त चुनाव लडेका थिए ।

भुमिकास्थान नगरपालिकामा माओवादी र कांग्रेस बिच चुनावी तालमेल थियो । गठबन्धनका तर्फबाट माओवादीका रेशम थापाले ५ हजार ३ सय २० मत ल्याएर विजयी भएका थिए । उनका निकटतम प्रतिद्वन्दी राष्ट्रिय जनमोर्चाका कवी खनालले ४ हजार ५ सय ४२ मत ल्याएका थिए । एमालेका पिताम्बर भुसालले ४ हजार २ सय ५० मत प्राप्त गरेका थिए । थापाले खनाललाई ७ सय ७८ र भुसाललाई १ हजार ७० मतले पछी पारेका थिए । यस्तै उपमेयरमा नेपाली कांग्रेसका खडानन्द बेल्वासेले ५ हजार २ सय ३० मत प्राप्त गर्दै विजयी बनेका थिए । एमालेकी सुनिता भुसाल बेल्वासेले ४ हजार ७ सय १ ल्याउँदा राष्ट्रिय जनमोर्चाकी सकुन्तला रानाले ३ हजार ५ सय ६६ मत ल्याएकी थिईन् ।

बिना गठबन्धन चुनावी प्रतिस्पर्धामा उत्रिएको पाणिनी गाउँपालिकामा अध्यक्ष पदमा कांग्रेसको बर्चस्व देखिएपनी उपाध्यक्षमा एमालेले बाजी मार्‍यो । अध्यक्षमा कांग्रेसका अच्युत गौतमले एमालेका जिवनारायण कोईरालालाई ४ सय ९२ मतले पछी पार्दै जित निकाल्न सफल भए । गौतमले ५ हजार ९ सय ७७ ल्याउँदा कोईरालाले ५ हजार ४ सय ८५ मत मात्र ल्याउन सके । उपाध्यक्षमा भने कांग्रेसकी अम्बिका पोख्रेललाई एमालेकी उम्मेद्वार लक्ष्मी गौतमले १ सय ३५ मतले पछी पारिन् । गौतमले ५ हजार ५ सय ४७ मत ल्याउँदा पोख्रेलले ५ हजार ४ सय १२ मत पाईन् ।

मालारानी गाउँपालिकामा कांग्रेस माओवादी तालमेल गरेर चुनाव लडेपनी एमालेलाई हराउन असमर्थ बन्यो । गठबन्धनको तर्फबाट अध्यक्षको उम्मेद्वार बनेका माओवादीका पदम क्षेत्रीलाई नेकपा एमालेका बालकृष्ण शर्मा आचार्यले ९ सय ९९ मतले पछी पारे । क्षेत्रीले ५ हजार ५ सय ४ मत पाए भने आचार्यले ६ हजार ५ सय ३ मत प्राप्त गरे । गठबन्धन बाटै उपाध्यक्षका उम्मेद्वार बनेकी नेपाली कांग्रेसकी शान्ता खनालले १ हजार ३ सय १२ मतले हार व्यहोर्नु पर्‍यो । एमालेकी उम्मेद्वार प्रमिला क्षेत्रीले ६ हजार ५ सय २२ मत ल्याएर विजयी भईन् भने कांग्रेसकी शान्ता खनालले ५ हजार २ सय १० मत मात्र ल्याउन सकिन् ।

छत्रदेव गाउँपालिकामा एक्लाएक्लै प्रतिस्पर्धा गर्दा प्रमुख उपप्रमुख दुवै कांग्रेसको पोल्टामा पर्‍यो । नेकपा एमालेका उम्मेद्वार ऋषी अधिकारीलाई १ हजार १ सय २ मतान्तरले हराउँदै नेपाली कांग्रेसका लेखनाथ पोख्रेल गाउँपालिका अध्यक्षमा विजयी बने । पोख्रेलले ६ हजार १ सय ६७ मत ल्याउँदा अधिकारीले ५ हजार ६५ मत मात्र पाए । यस्तै उपाध्यक्षमा एमालेकी मनी पन्थीलाई १ हजार ५ सय १६ मतान्तरले पछी पार्दै कांग्रेसकी तुलसीदेवी श्रेष्ठ विजयी भईन् । श्रेष्ठले ६ हजार १ सय ९० मत पाउँदा पन्थीले ४ हजार ६ सय १६ मत प्राप्त गरिन् ।