सन्धिखर्क नगरपालिकाको मेयरमा एमालेका कृष्ण प्रसाद श्रेष्ठ र उपमेयरमा मिश्रा आचार्य विजयी

सन्धिखर्क, अर्घाखाँची (अर्घाखाँचीडट्कम) । सन्धिखर्क नगरपालिकाको नगर प्रमुख पदमा नेकपा एमालेका कृष्ण प्रसाद श्रेष्ठ र उप प्रमुखमा मिश्रा आचार्य विजयी भएका छन् ।

२०७४ को स्थानीय तह निर्वाचनमा पनि श्रेष्ठ नगर प्रमुखमा उम्मेदवार थिए । त्यतिबेला कांग्रेस–माओवादीको चुनावी तालमेलमा कांग्रेसका कमलप्रसाद भुसालसँग ११ सय ३ मतान्तरले श्रेष्ठ पराजित भएका थिए । दोस्रो पटकमा श्रेष्ठ फराकिलो मतान्तरले विजयी भए ।

निर्वाचित श्रेष्ठको पार्टी एमालेले नगरको १२ वटा वडामध्ये वडा २, ६, ७ र ९ वडा अध्यक्षमा जित हासिल गरेको छ । माओवादीले वडा १० र कांग्रेसले वडा १, ३, ४, ५, ८, ११ र १२ वडा अध्यक्ष जितेको छ ।

सन्धिखर्क नगरपालिका नेकपा (एमाले) का केन्द्रीय सचिव एवं पूर्वउपप्रधानमन्त्री टोपबहादुर रायमाझीको घर भएको नगरपालिका हो । रायमाझीसँगै कांग्रेस केन्द्रीय सदस्य एवं संघीय संसदीय दलकी सचेतक पुष्पा भुसाल, केन्द्रीय सदस्य मानबहादुर विश्वकर्मा, पूर्वकेन्द्रीय सदस्य रेवतीप्रसाद भुसाल, माओवादी केन्द्रका नेता डिलाराम आचार्यको जन्म घर हो । सबै नेताको एउटै ९ नम्बर वडामा घर पर्छ । उक्त वडा पनि एमालेले जितेको छ ।

जिल्लाका ६ स्थानीय तहमध्ये ५ पालिकाको अन्तिम मतपरिणम सार्वजनिक भएको छ । शितगंगा नगरपालिकाको मतगणना जारी छ ।

एमालेले पाणिनि र मालारानी गाउँपालिका र सन्धिखर्क नगरपालिकामा दुवै पद जितेको छ । छत्रदेव गाउँपालिकामा उपाध्यक्ष पद जितेको छ ।

२०७४ को स्थानीय तह निर्वाचनमा ४ पालिका मध्ये पाणिनिमा अध्यक्ष, छत्रदेवमा दुवै पद, शितगंगा र सन्धिखर्क नगरमा प्रमुख र भुमिकास्थान नगरमा उपप्रमुख पद जितेको कांग्रेसले यसपाली छत्रदेव गाउँपालिकाको अध्यक्ष पद मात्रै जितेको छ । भुमिकास्थान नगर प्रमुखमा राजमो र माओवादीले जितेको छ । २०७४ मा एमालेले मालारानी गाउँपालिकाका दुवै पद र पाणिनिको उपाध्यक्ष पद जितेको थियो । एमालेबाट पाणिनिको उपाध्यक्षमा निर्वाचित लक्ष्मी गौतम केही महिना अघि कांग्रेसमा प्रवेश गरेकी थिइन । कांग्रेसले उनै गौतमलाई पुनः उपाध्यक्ष पदमा उम्मेदवार बनाएको थियो । एमालेकी नर्मदा पौडेलसँग पराजित भइन ।