चैत्र २४ गते, २०७९ मा प्रकाशित
एजेन्सी । इजरायली सेनाले लेबनान र प्यालेस्टाइनको गाजामा हवाइ आक्रमण सुरू गरेको छ ।
लेबनानबाट बिहीबार इजरालयमा क्षेप्यास्त्र प्रहार भएको जवाफी कारबाही स्वरुप इजरायली प्रतिरक्षा फौजले शुक्रबार बिहानै लेबनान र गाजा क्षेत्रमा हवाई आक्रमण थालेको हो ।
इजरायली सेनाले बिहानैदेखि लडाकु विमानबाट उत्तरी लेबनान र गाजामा बमबारी थालेको अन्तर्राष्ट्रिय सञ्चार माध्यमहरुले जनाएका छन् ।
इजरायली प्रतिरक्षा फौजले गाजाको बैत हनाउन र खान युनिसस्थित प्यालेस्टिनी लडाकु समूह हमासका बंकरमा बम हानेको बताइएको छ ।
यस्तै, इजरायली सेनाले उत्तरी गाजाको एउटा हतियार गोदाममा पनि ड्रोन आक्रमण गरेको छ ।
बिहीबार लेबनानभित्रबाट ३४ वटा क्षेप्यास्त्र इजरायलमाथि प्रहार भएको इजरायलले बताएको छ । उक्त आक्रमण प्यालेस्टिनी लडाकु हमास वा इस्लामिक जिहादी समूहले गरेको हुनसक्ने अनुमान गरिएको छ ।
लेबनानी सेनाले लेबनानी लाडकु समूह हलबुल्लाहले इजरायलमा आक्रमण नगरेको बताएको छ ।
इजरायली प्रधानमन्त्री बेञ्जामिन नेतान्याहूले इजरायलमाथिको आक्रमणको मूल्य चुकाउनु पर्ने भन्दै शत्रुहरुलाई ठेगान लगाउन कारबाही थालेको बताउनु भएको छ ।
अन्य समाचारहरु
