चिलीमा वामपन्थी उम्मेदवार गाब्रिएल बोरिक राष्ट्रपतिमा निर्वाचित

चिलीमा वामपन्थी उम्मेदवार गाब्रिएल बोरिक  राष्ट्रपतिमा निर्वाचित

चिलीको राष्ट्रपति पदमा वामपन्थी उम्मेदवार गाब्रिएल बोरिकले निर्वाचित हुनुभएको छ । विश्वकै कम उमेरका नेताहरूमध्ये एक ३५ वर्षीय बोरिक चिलीको इतिहासमा सबैभन्दा कम उमेरका राष्ट्रपति हुनुभएको हो ।

उहाँका निकटतम प्रतिस्पर्धी चरम दक्षिणपन्थी उम्मेदवार जोस एन्टोनियो कास्टले आधा मतपत्र गणना भएकै बेला आफ्नो पराजय स्वीकार गरिसक्नुभएको छ । कास्टले एक ट्विट गर्दै विशाल जितका लागि बोरिकलाई बधाइ दिइसक्नुभएको छ ।

गनिएको करिब आधा मतपत्रमा बोरिकले ५५.७३ प्रतिशत मत पाउनुभएको थियो भने कास्टले ४४ .२७ प्रतिशत मत प्राप्त गर्नुभएको थियो ।

सन् २०१९ र २०२० मा चिलीमा असमानता र भ्रष्टाचारको विरोधमा सरकारी विरोधका प्रदर्शनपछि निर्वाचन भएको हो । ल्याटिन अमेरिकामा कुनै बेला आर्थिकरूपमा सर्वाधिक सन्तुलित अर्थतन्त्र भएको चिली विश्वकै सर्वाधिक आम्दानी असमानता भएको देश मानिन्छ ।

दुबै प्रतिस्पर्धी सरकारमा नगएका राजनीतिक पार्टीको प्रतिनिधित्व गर्दै चुनावमा होमिनुभएको  थियो । 

बोरिकले चिलीको निवृतभरण र स्वास्थ्य प्रणालीमा सुधार ल्याएर, सातामा ४५ देखि ४० घन्टाको काम घण्टा निर्धारण गर्ने र हरित लगानी प्रवर्द्धन गरी असमानता हटाउने प्रतिबद्धता व्यक्त गर्नुभएको छ।

उहाँका प्रतिस्पर्धी कास्टले कानुन व्यवस्था बनाएर, कर र सामाजिक खर्च घटाउने वाचा गर्नुभएकाे थियाे । कास्टले पूवै सैनिक जनरल अगस्टो पिनोसेको विरासतलाई सही ठहर मान्नुभएको थियो ।

पिनासेले सन् १९७३ मा सत्ता कब्जा गरी १९९० सम्म शासन गर्नुभएको थियो । उहाँको कार्यकालमा तीन हजार मानिसको हत्या भएकाे थियो । हजारौं राजनीतिक कार्यकतालाई बेपत्ता पारेर नजरबन्दमा राखिएको थियो । –एजेन्सीहरू

अन्य समाचारहरु