सरकारद्धारा चुनावको तयारीमा जुट्न सबै पक्षलाई आग्रह

काठमाडौं  । सरकारले चुनावको तयारीमा जुट्न सबै पक्षलाई आग्रह गरेको छ । मंगलवार बसेको मन्त्रिपरिषद् बैठकले आफ्नो सम्पूर्ण ध्यान चुनावमा केन्द्रित गर्ने निर्णयगर्दै चुनावको तयारीमा जुट्न सबै पक्षलाई आग्रह गरेको हो । सिंहदरवारमा बसेको बैठकमा मन्त्रिपरिषद्का अध्यक्ष खिलराज रेग्मीले सम्पूर्ण ध्यान चुनावमा केन्द्रित गरेर काम अघि वढाउन मन्त्रीहरुलाई निर्देशन दिएको बताइएको छ ।

बैठकले सरकारको काम कारवाहीबारे नियमित रुपमा पत्रकार सम्मेलन मार्फत जानकारी गराउने, सबै मन्त्रालयहरुले महत्वपूर्ण निर्णय गरेको २४ घण्टा भित्र वेभसाइटमा सूचना राख्नुपर्ने, राज्यबाट प्राप्त बाहेक अन्य थप सुविधा नलिने र चालु आयोजनाहरुलाई समयमै सम्पन्न गर्न अधिकतम प्रयास गर्ने लगायतका निर्णय पनि गरेको छ ।

 

बैठकले सरकारको प्रवक्ताको जिम्मेवारी मन्त्री माधवप्रसाद पौडेललाई दिएको छ । हिजो मन्त्रिपरिषद्ले पूर्णता पाएपछि आज बैठक बसेको हो ।

बैठकले संवैधानिक परिषद्मा मन्त्रिपरिषद्बाट प्रतिनिधित्व गर्ने सदस्यहरुको नाम टुंगो लगाउने तथा निर्वाचनको मिति तोक्ने बताइए पनि त्यसबारे कुनै निर्णय नभएको जनाइएको छ ।