वाङलामा खुल्ला दिसामुक्त तथा पूर्ण सरसफाइ सम्बन्धी सचेतीकरण तथा अभिमुखिकरण तालिम सम्पन्न

वाङ्ला, अर्घाखाँची । जिल्ला शिक्षा कार्यालय अर्घाखाँचीको आयोजनामा वाङला गाविसका सबै विद्यालयका प्रअ विद्यालय व्यवस्थापन समिति र शिक्षक अभिभावक संघका पदाधिकारी र सरोकारवालाहरुको खुल्ला दिसामुक्त तथा पूर्ण सरसफाइ सम्बन्धी सचेतीकरण तथा अभिमुखिकरण तालिम सम्पन्न गरियो ।

जिवनोद्वार उच्च माविमा सञ्चालित तालिममा सफलताको कथा नामक भिडियो हेर्दै सहभागिहरु

वडा नं ५ को सरस्वती निमाविमा वडा नं १ देखि ५ वडाका चारवटा बिद्यालयबाट ३२ जनाको सहभागिता रहेको तालिमको सहजीकरण इकार्डस् प्रागको तर्फबाट प्रेम नारायण गैरे र जि एस एफ प्रोग्रामका जिल्ला संयोजक विष्णु दवाडीले गर्नु भएको थियो ।

त्यसै गरि जीवनोद्वार उच्च माविमा सञ्चालन गरिएको कार्यक्रममा वडा नं ६ देखि ९ का ६ वटा बिद्यालयबाट ५० जनाको सहभागिता रहेको थियो । तालिमको सहजीकरण इकार्डस् प्रागको तर्फबाट गोपाल घिमिरे र जि एस एफ प्रोग्रामका जिल्ला संयोजक विष्णु दवाडीले गर्नु भएको थियो । कार्यक्रममा प्रमुख अतिथि जिल्ला शिक्षा कार्यालयका प्रतिनिधी नम बहादुर सिंहले शिक्षा क्षेत्रले जिल्लाले लिएको सरसफाइ लक्ष्यलाई पुरा गर्न अभियानको नेतृत्व स्थानीय स्तरबाट गरिनु पर्ने र शैक्षिक क्षेत्रले महत्वपूर्ण भूमिका निर्वाह गरि विद्यालय र विद्यालय सेवा क्षेत्रलाई नमुना बनाउनु पर्ने भनाई राख्नु भएको थियो ।

कार्यक्रममा नेपालको सरसफाइ गुरुयोजना, नेपालको राष्ट्रिय लक्ष्य, अर्घाखाँची जिल्लाको खुल्ला दिसामुक्त घोषणा गर्ने लक्ष्य, नेपालमा सरसफाइको विकासक्रम, खुल्ला दिसामुक्त अभियान, सरोकारवालाहरुको भूमिका आदिको बारेमा प्रस्तुतिकरण तथा छलफल गरिएको थियो । नेपालको सरसफाइ गुरुयोजना सार्वजनिकीकरण, चर्पी बिहे र सफलताको कथा नामक भिडियो समेत प्रदशर्न गरिएको थियो । २०७० असार मसान्तको संङ्कलित तथ्याङ्क अनुसार हाल १२२४ घर संङ्ख्या रहेको वाङ्लामा ६१३ सुरक्षित चर्पी रहेको छ ।

जिल्ला शिक्षा कार्यालयका प्रतिनिधी एवं विद्यालय स्रोत ब्यक्ति नम बहादुर सिंह-मन्तब्य ब्यक्त गर्दै

कार्यक्रममा गाविस सचिव एवं गाविस स्तरीय खानेपानी सरसफाइ तथा स्वच्छता समन्वय समितिका अध्यक्ष बिष्णु प्रसाद भट्टराईको समेत उपस्थिति थियो । सम्बन्धित बिद्यालयका प्र अ तथा प्राचार्यको संयोजकत्वमा सम्पन्न उक्त कार्यक्रममा सहभागी मध्येका वक्ताहरुले सरसफाइ अभियान अति नै पवित्र र आवश्यक अभियान रहेछ भन्ने जानकारी पाएकोले सो अभियानमा आत्मादेखि नै लाग्ने प्रतिबद्धता जाहेर गर्नु भएको थियो । गत बर्ष साउन महिना देखि जिल्लाका ३२ गाविसमा र फाल्गुण महिना देखि थप १० गाविसमा गरि ४२ वटै गाविसमा ग्लोबल सेनिटेसन फण्डको आर्थिक सहयोगमा नेष्ट, इकार्डस् सिसेक, प्राग र लुम्बिनी सामाजिक विकास केन्द्र नामक संस्थाहरुले पूर्ण सरसफाइ अभियान अन्तर्गत क्षमता अभिबृद्धि, क्षेत्रगत समन्वय र खुल्ला दिसामुक्त तथा सरसफाइ र स्वच्छता प्रवर्धन जस्ता क्षेत्रहरुमा सहजीकरण गर्दै आईरहेका छन् ।

Premnarayan Acharya in Arghakhanchi contributed to this report.

अर्घाखाँचीडट्कमलाई सहयोग गर्न तल देखिने विज्ञापनहरुमा बारम्बार क्लिक गर्नुस्।