पाल्पामा भएको बस दुर्घटनामा अर्घाखाँची नरपानीका एक जनाको मृत्यु

तानसेन, पाल्पा बिहीबार २३ माघ, २०७० । पाल्पामा भएको बस दुर्घटनामा अर्घाखाँची जिल्लाको नरपानी गाबिस वार्ड नम्बर- ८ का पदम झाँक्री मगरको मृत्यु भएको छ।

अन्दाजी ६०-६२ वर्षिय  पदम सहित दुर्घटनामा १४ जनाको मृत्यु भएको छ। १२ जनाको घटनास्थलमै र २ जनाको उपचारका क्रममा मृत्यु भएको हो।

पोखराबाट भैरहवातर्फ जाँदै गरेको लु १ ख ४९२४ नम्बरको यात्रुवाहक बस सिद्धार्थ राजमार्ग अन्तर्गत चिदीपानी गाविसको वडा नं. २ भालुखोलामा दुर्घटनाग्रस्त भएको हो। बस सडकबाट ५ सय मिटर तल खोलामा थियो।

बसमा सवार अन्य ७ जना घाइते भएका छन्। घाइतेहरुको तानसेनस्थित युनाइटेड मिसन अस्पताल र प्रभासको लुम्बिनी मेडिकल कलेजमा उपचार भइरहेको प्रहरीले जनाएको छ।

राति १ बजेको समयमा दुर्घटना भएको थियो। दुर्घटनाको जानकारी पाएलगत्तै नेपाली सेना, सशस्त्र प्रहरी, नेपाल प्रहरी र स्थानीय वासिन्दा उद्धारमा खटिएका थिए। रातको समय भएकोले उद्धारका लागि निकै कठिनाइ भएको थियो।