जेष्ठ ११ । अमेरिकाको क्यालिफोर्नियामा गत शुक्रबार गोलीकाण्ड मच्चाउने व्यक्ति हलिउड निर्देशक पीटर रोजरका छोरा इलियट रोजर रहेको खुलेको छ ।क्यालिफोर्नियास्थित आफनै अपार्टमेन्टमा रहेका तीन महिलाको हत्या गरी गाडीमा हिँडेका उनले बाटो हिंड्ने अरु तीन जनाको पनि गोली हानी हत्या गरेका थिए ।
उनको पिछा गरेको प्रहरीलाई पनि गोली हानेका रोजरको कार सडक पेटीमा ठोक्किँदा उनको मृत्यु भएको थियो । मृत अवस्थामा फेला परेका उनको टाउकोमा गोली लागेको थियो । अभियुक्तले आफैलाई गोली हानी आत्महत्या गरेको हुनसक्ने आशंका प्रहरीको छ ।
निर्देशक पिटर रोजरले हत्यामा छोराको संलग्नता स्वीकार्दै घटनाप्रति खेद ब्यक्त गरेका छन् । उनले आफनो छोराको कतूर्तबारे कुनै जानकारी नभएको भन्दै ज्यान गुमाएका परिवारका सदस्यप्रति समवेदना प्रकट गरेका छन् । घटनास्थलबाट एउटा अर्धस्वचालित हाते बन्दुक फेला परेको थियो । घटनामा सात जना घाइते भएका थिए । AGENCIES
जेष्ठ ११ गते, २०७१ मा प्रकाशित
