चीनका राष्ट्रपति सी जिनपिङले एसिया प्रशान्त क्षेत्रका राष्ट्रहरुलाई एकीकृत आर्थिक गतिविधिलाई गति दिइ विश्वब्यापी आर्थिकबृद्धि गर्न अपील गरेका छन् । चीनमा आयोजना गरिएको एसिया प्रशान्त आर्थिक सहयोग संगठन (एपेक)को दुईदिने सम्मेलनलाई सम्बोधन गर्दै राष्ट्रपति सीले उक्त कुरा बताएका हुन् ।
अमेरिका र चीनबीचको व्यापार योजनामा केही मतभेद भइरहेको अवस्थामा दुबै देशले प्रविधि उत्पादनमाथिको भन्सार शुल्क हटाउने सम्झौता गरी व्यापारको क्षेत्रमा क्रमभंगता गरेका छन् ।
यसैबीच, बैठकमा सहभागी राष्ट्रप्रमुखहरुले युक्रेन संकट र हराइरहेको मलेसियन विमान पत्ता लगाउन नसकेकोमा चर्को आलोचना गरेका छन् ।
युक्रेनका विषयमा रुसविरुद्ध आर्थिक प्रतिबन्ध लगाइएपछि रुस एक्लो भएको प्रतिक्रिया बैठकमा सहभागीहरुले दिएका छन् ।
अमेरिकी राष्ट्रपति बाराक ओबामा र रुसका राष्ट्रपति भ्लादिमीर पुटिनबीच पनि इरान, सिरिया र युक्रेनका विषयमा छलफल भएको छ । दुई नेताबीच तीनपटक भएको भेटवार्तामा इरानको आणविक कार्यक्रमबारे पनि छलफल भएको थियो ।
ओबामाले जापानी प्रधानमन्त्री सिन्जो आबेसँग भने सीमा समस्याकाबारेमा कुराकानी गरेको बुझिएको छ ।
चीनले भने एपेकको क्षमता बृद्धिका लागि एक करोड अमेरिकी डलर सहयोग गर्ने घोषणा गरेको छ । (एजेन्सी)
कार्तिक २६ गते, २०७१ मा प्रकाशित
