काठमाडौंस्थित मुलुककै १६६ वर्ष पुरानो विद्यालय दरबार हाइस्कुलको पुनःनिर्माण सम्पन्न
जेष्ठ १० गते, २०७६ मा प्रकाशित
काठमाडौंस्थित मुलुककै पुरानो विद्यालय दरबार हाइस्कुलको पुनःनिर्माण सम्पन्न भएको छ ।
वि.सं. २०७२ वैशाख १२ गतेको विनाशकारी भूकम्पले क्षतिग्रस्त भएको विद्यालय चीन सरकारको सहयोगमा निर्माण गरिएको हो ।
गोरखा महाभूकम्प गएको तीन वर्षपछि चिनियाँ सहयोगमा पुनःनिर्माण थालिएको दरबार हाइस्कुलको शुक्रबार उद्घाटन गरिएको छ ।
काम थालिएको ९ महिनामै स्कुल तयार गर्न सफल हुनु सुुखद् भएको नेपालका लागि चिनियाँ राजदूत हउ यान्छीले बताइन् ।
चिनियाँ सहयोगमा सुरु गरिएका २५ आयोजनामध्येको यो एक हो ।
२० महिनामा निर्माण सक्ने लक्ष्य राखेर थालिएको पुनःनिर्माण समयभन्दाअघि नै सकिनु उत्साहजनक भएको राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशील ज्ञवालीले बताए ।
यस्ता आयोजनाबाट नेपालीले सिक्ने अवसर पाएको उनको भनाइ थियो ।
१६६ वर्ष पुरानो दरबार हाइस्कुल नेपालको पहिलो विद्यालय हो ।
८० करोड रुपैयाँको लागतमा भवन निर्माणको काम सम्पन्न भएपनि यो भवनमा विद्यालय सन्चालनका लागि थप केही समय लाग्नेछ ।
९ रोपनी ३ आना जग्गामा बनेको ४६ कोठे ४ तल्ले भवनको बाहिरीस्वरुप पुरानै भएपनि भित्री बनावट पहिलेकोभन्दा केही फरक छ ।
भूकम्पले भत्काएपछि विद्यालयको पठन–पाठन अस्थायी टहरामा हुँदै आएको थियो ।
शिक्षक तथा विद्यार्थीहरु अस्थायी टहरामा अध्ययन–अध्यापन कठिन भएको अनुभव सुनाउँदै नयाँ भवनले उत्साह थपेको बताउँछन् । इमेजखबरमा समाचार छ ।
जेष्ठ १० गते, २०७६ मा प्रकाशित
