प्रेमनारायण आचार्य
ढाकावाङ, अर्घाखाँची (अर्घाखाँचीडट्कम) । अर्घाखाँची जिल्लाको भूमिकास्थान नगरपालिका वार्ड नं. १ ढाकावाङमा
भारतबाट रोजगारी गुमाएर फर्किएका परिवारलाई कुखुरा र आधुनिक माहुरीका घार निःशुल्क वितरण गरिएको छ ।
ढाकावाङमा कोरोनाका कारण रोजगारी गुमाइ भारतबाट फर्किएर घरमा बसेकाहरुलाई स्वरोजगार बनाउन र आय आर्जनमा बृद्धि गर्नका लागि १५ घर परिवारलाई कुखुरा र २० घर परिवारलाई आधुनिक माहुरीका घार वितरण गरिएको हो ।
जनचेतना सरोकार मञ्च अर्घाखाँचीले अक्सफार्म नेपालको सहयोगमा कोरोनाका कारण भारतबाट रोजगारी गुमाएर घर फर्किएका मौसमी प्रवासी कामदारहरु १५ घर परिवारलाई १ सय वटाका दरले स्थानीय जातका १५ सय कुखुराका चल्ला र २० घरपरिवारलाई ५ वटाका दरले १ सय वटा आधुनिक माहुरीका घार वितरण गरेको जनचेतना सरोकार मञ्चका कार्यक्रम संयोजक युवराज ज्ञवालीले बताउनुभयो ।
परिवार पाल्न भारतमा गएको समयमा कोरोनाले घरमा फर्किएका परिवारलाई आयआर्जनमा सहयोग पुगोस् र घरको खर्च धान्ने माध्यम बनोस् भनेर माहुरीका घार र कुखुराका चल्ला वितरण गरेको नगरपालिकाका प्रमुख रेशम थापाले बताउनुभयो । अति विपन्न परिवार र आम्दानीको श्रोत पनि केहि नभएकोले यी परिवारलाई उपलब्ध गराइएको नगर प्रमुख थापाको भनाइ छ ।
पौष १५ गते, २०७७ मा प्रकाशित
