अर्घाखाँचीबाट निर्वाचित पुर्व संविधान सभा सदस्य दुमन सिंह थापाको ६२ बर्षको उमेरमा निधन (पुरा जीवनी सहित)

काठमाडौं (अर्घाखाँचीडट्कम) । अर्घाखाँचीमा एमालेबाट निर्वाचित पुर्व संविधान सभा सदस्य दुमन सिंह थापाको निधन भएको छ ।

एमालेबाट निर्वाचित पुर्व संविधान सभा सदस्य दुमन सिंह थापाको आज आईतवार साँझ ७ बजे ६२ बर्षको उमेरमा काठमाडौंको हेम्स हस्पिटलमा सघन  उपचारको क्रममा निधन भएको हो ।  

थापालाई कोरोना संक्रमण भएको बताइएको छ ।  साथै ३ दिन अगाडि मृगौलासम्बन्धी रोग, उच्च रक्तचाप लगायतका बिरामीका कारण थापालाई काठमाडौंको हेम्स हस्पिटलमा सघन  उपचार गरिरहेको थियो ।  थापाको दुई वर्षअघि मृगौला प्रत्यारोपण भएको थियो । उनी ३ वर्षदेखि बिरामी थिए  । 

नरपानीमा जन्मेका थापाले ०७० सालमा अर्घाखाँची क्षेत्र नम्बर २ बाट संबिधान सभामा तत्कालीन एमालेबाट चुनाव जितेका थिए ।  पछिल्लो समय  नेकपा (एकीकृत समाजवादी)मा थिए ।

परियोजनामार्फत उनले जिल्लाको नरपानी, धातीवाङ, अर्घा धरमपानीलगायतका अधिकांश गाउँमा खानेपानी योजना सञ्चालन गरेर स्थानीयको घर–घरमा खानेपानीका धारा जडान गरेका थिए । उनले खानेपानी, विभिन्न भवन निर्माण, आयआर्जन, महिला उद्यम सम्बन्धी करोडौंको परियोजना सञ्चालन गरेका थिए । यही लोकप्रियताका कारण थापाले संविधानसभाको निर्वाचनमा कांग्रेस नेतृ पुष्पा भुसाललाई पराजित गरेका थिए ।

एमाले विभाजनपछि उनी माधव नेपाल नेतृत्वको एकीकृत समाजवादी पार्टीमा लागेका थिए । विकास निर्माणमा जिल्लामा ठूलो योगदान गरेका थापाको निधनले पाटीलाई ठूलो क्षति भएको समाजवादीका जिल्ला अध्यक्ष रामबहादुर चौहानले बताए । थापा जिल्लामा बौद्धिक व्यक्तिको रुपमा परिचित थिए ।

उनी मेगा बैंकका सञ्चालक एवं नयाँ पत्रिका दैनिकका अध्यक्ष समेत थिए । दुमन थापा अमेरिकी पूर्वराष्टपति कार्टर सेन्टरको नेपाल प्रतिनिधि भएर नेपालको द्वन्द्व व्यवस्थापन र शान्ति प्रक्रियाको सहजकर्ता समेत भएको एमाले जिल्ला नेता प्रेम नारायण गैरेले बताए ।